Norræn sendiráð geta orðið enn mikilvægari málsvarar jafnréttis

„Það er gríðarlega mikilvægt að halda áfram baráttunni gegn bakslaginu gegn jafnrétti kynjanna og LGBTI samfélaginu. Við höfum langa og góða reynslu af norrænu samstarfi á sviði jafnréttismála og í málefnum LGBTI og það er skylda okkar að leggja okkar af mörkum þar sem réttindi kvenna og LGBTI fólks eiga undir högg að sækja,“ segir Katrín Jakobsdóttir, forsætis- og jafnréttisráðherra Íslands, sem gegnir formennsku í Norrænu ráðherranefndinni í ár.

Þegar fyrir tveimur árum byrjuðu ráðherrarnir að ræða nýtt bakslag í jafnréttismálum almennt og einkum þegar kemur að réttindum stúlkna, kvenna og LGBTI fólks.

Það lýsir sér meðal annars með skertum rétti til kynfrelsis og barneigna í mörgum löndum, auknu netníði sem oftar beinist gegn konum um allan heim og ofbeldi gegn LGBTI fólki og skerðingu á lífskjörum þess.

Í „Pushing back the push-back, a Nordic Roadmap“ frá 2022 lýsa norrænu jafnréttisráðherrarnir því hvernig þeir vilja meðal annars mæta andstöðunni með því að tala einum norrænum rómi í jafnréttis- og réttindamálum og skapa þrýsting í tengslum við alþjóðlegar viðræður og fundi. 

Á jafnréttisfundi Sameinuðu þjóðanna, CSW67, í New York í mars ræddu norrænu jafnréttisráðherrarnir meðal annars lausnir á kynbundnu netníði og boðskapurinn fór ekki á milli mála: „Norðurlönd eru tilbúin að snúa vörn í sókn í baráttunni fyrir kynjajafnrétti.“ 

Á fundi sínum í Reykjavík þann 26. september ákváðu jafnréttisráðherrarnir að halda áfram aðgerðum sínum í tengslum við „Pushing back the push-back“. 

Aðgerðirnar sem ráðherrarnir samþykktu lúta meðal annars að vitundarvakningarátaki fyrir unga Norðurlandabúa sem ætlað er að koma í veg fyrir hatursorðræðu og áreitni.

Þá samþykktu ráðherrarnir að fjármagna nýja rannsókn um karlmennsku og sýn karla á jafnrétti á Norðurlöndum.

Einnig munu ráðherrarnir setja í gang stefnumótandi vinnu með völdum sendiráðum víðs vegar um heiminn til að vinna gegn bakslaginu í jafnréttismálum.

Það getur meðal annars falist í samstarfi við samtök sem vinna að jafnrétti og réttindum LGBTI fólks eða skoðanamyndandi vinnu.

Aðgerðirnar hefjast á næsta ári, 2024, undir formennsku Svíþjóðar í ráðherranefndinni.

„Norðurlönd eiga að vera drifkraftur í alþjóðlegu jafnréttisstarfi og stuðla að jöfnum réttindum til handa LGBTI fólki. Ef til vill er það mikilvægara en nokkru sinni. Sem jafnréttisráðherra Svíþjóðar hlakka ég til að taka við formennsku í ráðherranefndinni um jafnréttismál á næsta ári og vinna að þessum norrænu grundvallargildum,“ segir Paulina Brandberg, jafnréttisráðherra Svíþjóðar.