Norræna Atlantshafssamstarfið fær eigin stefnumörkun

NAUST gengur í meginatriðum út á samstarf milli Færeyja, Grænlands, Íslands og strandlengju Noregs frá Rogalandi til Finnmerkur. Stefnumörkuninni er ætlað að vísa veginn í norræna Atlantshafssamstarfinu og meðal annars stuðla að því að efla tengsl milli lykilaðila á svæðinu.

Stefnumörkunin veitir samstarfsáætluninni um byggðaþróun og skipulagsmál aukna dýpt og myndar góðan þekkingargrundvöll fyrir áframhaldandi þróun á svæðinu. Norðurlönd eru öflugri saman en sitt í hverju lagi og vaxandi áhugi umheimsins á svæðinu getur orðið löndunum tilefni til að leggja línurnar fyrir eigin þróun. Norræna Atlantshafssamstarfið (NORA) sér um að innleiða markmið og forgangsatriði NAUSTs.

Ísland átti upphaflega frumkvæði að því í formennskutíð sinni í Norrænu ráðherranefndinni árið 2014 að móta stefnu fyrir norræna Atlantshafssamstarfið á Norðurlöndum.

„Ég fagna því að norrænu byggðamálaráðherrarnir hafi samþykkt stefnumörkunina. Hún beinir aukinni athygli að svæði sem verður sífellt áhugaverðara í augum umheimsins. Á Norður-Atlantshafssvæðinu eru einstök sóknarfæri og einnig sérstakar áskoranir. Það er mikilvægt að við eflum samstarf okkar líka á þeim slóðum,“ segir samgöngu- og sveitarstjórnarráðherra Íslands, Sigurður Ingi Jóhannsson, sem er formaður norrænu ráðherranna um málefni byggðastefnu.

Í starfi sínu hefur NAUST hliðsjón af heimsmarkmiðum Dagskrár 2030 um sjálfbæra þróun og einnig forgangsatriðum Norrænu ráðherranefndarinnar á sviðum sjálfbærrar þróunar, málefna barna og ungmenna og jafnréttismála.

Í Danmörku eru kosningar til þjóðþingsins nýyfirstaðnar og ný ríkisstjórn verður mynduð þann 27. júní. Því mun Danmörk afgreiða málið síðar í skriflegu ferli.