Norðurlandaráð hvetur Tyrkland til að endurnýja aðild sína að Istanbúlsamningnum

„Istanbúlsamningurinn er mikilvægari nú en nokkru sinni fyrr, á tímum þegar COVID-19-faraldurinn, stríð og átök hafa í för með sér aukið ofbeldi gegn konum. Því er mikið áhyggjuefni að Tyrkland hafi nú ákveðið að segja sig frá Istanbúlsamningnum. Sú ákvörðun grefur undan grundvallarréttindum tyrkneskra stúlkna og kvenna og sviptir þær nauðsynlegri réttarvernd gegn ofbeldi,“ segir í yfirlýsingunni.

Forsætisnefndin og velferðarnefndin hvetja Tyrkland til að endurnýja aðild sína að samningnum og taka þannig skýra afstöðu með réttindum stúlkna og kvenna.

„Norðurlönd eiga að taka sameiginlega afstöðu gegn aðgerðum sem brjóta gegn réttindum kvenna, hvar sem þær eiga sér stað í heiminum. Jafnrétti og mannréttindi eru ofarlega á dagskránni hjá velferðarnefnd Norðurlandaráðs, sem telur það sjálfsagðan hlut að skipta sér af alþjóðamálum þar sem vegið er að mannréttindum og norrænum gildum,“ segja Bente Stein Mathisen og Nina Sandberg, formaður og varaformaður í norrænu velferðarnefndinni.

Það var velferðarnefndin sem átti frumkvæði að yfirlýsingunni. Forsætisnefndin lýsti einnig yfir stuðningi við yfirlýsinguna á næsta fundi sínum. Velferðarnefndin vinnur meðal annars að auknu jafnrétti kynja og er ein af fjórum fagnefndum Norðurlandaráðs.

Tyrkland tilkynnti það í mars 2021 að landið hygðist segja sig frá samningnum. Ákvörðuninni hefur verið mótmælt bæði í Tyrklandi og alþjóðlega.

„Lýðræði, réttarríkið, jöfnuður og mannréttindi, þar með talin réttindi kvenna, eru grundvallargildi fyrir Norðurlandaráð og við viljum líka standa vörð um þau alþjóðlega. Á þessum gildum er einnig vakin athygli í stefnu Norðurlandaráðs í alþjóðamálum,“ segir forseti Norðurlandaráðs, Bertel Haarder.

Bæði velferðarnefndin og forsætisnefndin hafa lýst yfir fullum stuðningi við yfirlýsinguna.