Barnabætur á Álandseyjum

Tilgangur barnabóta er að standa straum af hluta af kostnaði frá mánuðinum eftir fæðingu barns til mánaðarins er barnið nær 17 ára aldri. Landsstjórn Álandseyja greiðir barnabætur til þeirra sem hafa fasta búsetu með barni á Álandseyjum en að öðru leyti gilda finnskar reglur og sótt er um barnabætur hjá FPA. 

Finna má nánari upplýsingar um barnabætur og barnabætur við flutning eða vinnu í öðru ESB- eða EES-ríki á síðu Info Norden, „Barnabætur í Finnlandi“.

Upphæð barnabóta er hærri á Álandseyjum en annars staðar í Finnlandi. Barnabætur á Álandseyjum miðast við fjölda barna og hækka með hverju barni sem er yngra en 17 ára í fjölskyldunni. Upphæð barnabóta fyrir íbúa Álandseyja er gefin upp á vef FPA.

Við flutning til Álandseyja frá Finnlandi eru álenskar barnabætur greiddar frá og með mánuði flutnings og ekki þarf að skila sérstakri umsókn. FPA aðlagar barnabæturnar sjálfkrafa þegar bæði barnið og viðtakandi barnabótanna hafa skráð lögheimili á Álandseyjum.

Framfærslustyrkur til einstæðra foreldra er 80 evrur á mánuði fyrir hvert barn sem gefur rétt til barnabóta og sem býr á sama heimili. Hægt er að sækja um styrkinn ef foreldrarnir eru ekki giftir eða í sambúð, eða ef flutt er frá maka með það að markmiði að slíta sambúðinni. Styrkurinn er veittur jafnvel þótt foreldrar fari sameiginlega með forsjá barns.

Nánari upplýsingar um framfærslustyrk einstæðra foreldra fást á vefsvæði FPA.

Á síðu Info Norden má finna upplýsingar um barnabætur í öðrum norrænum löndum og samskiptaupplýsingar þeirra stofnana sem geta svarað spurningum.