Bætur til eftirlifandi aðstandenda í Finnlandi

Kuolemantapauksessa maksettavat Suomen etuudet
Hér segir frá finnskum fjölskyldulífeyri vegna fráfalls aðstandanda, eða lífeyri til eftirlifandi maka og barna. Sömu reglur gilda einnig á Álandseyjum.

Fólk sem misst hefur náinn aðstandanda getur fengið fjölskyldulífeyri frá finnsku almannatryggingastofnuninni (Kansaneläkelaitos eða Kela), úr starfstengdum lífeyrissjóði og einnig frá tryggingafélagi, sem dæmi. Fjölskyldulífeyrir er fjárhagslegur stuðningur við fjölskyldu.

Ef hinn látni var tryggður í Finnlandi geta eftirlifandi makar og börn fengið fjölskyldulífeyri, einnig þó að þau búi í öðru landi.

Lífeyrir eftirlifandi maka

Fjölskyldulífeyri er hægt að fá frá Kela og úr starfstengdum lífeyrissjóði. Eftirlifandi makar geta þegið lífeyrisgreiðslur frá Kela og úr starfstengdum lífeyrissjóði á sama tíma. Sambúðaraðilar eiga einnig rétt á slíkum greiðslum.

Lífeyrir Kela til eftirlifandi maka samanstendur af upphafslífeyri og framhaldslífeyri. Greiðslurnar hætta að berast við 65 ára aldur í síðasta lagi. Nánari upplýsingar eru á vefsvæði Kela.

Starfstengdir lífeyrissjóðir greiða lífeyri til eftirlifandi maka án aldurshámarks, en greiðslur vegna andláts maka á árinu 2022 eða síðar eru tímabundnar ef eftirlifandi maki er fæddur 1975 eða síðar. Lífeyrir starfstengdra lífeyrissjóða til eftirlifandi maka er starfstengdur lífeyrir sem maki þinn vann sér inn í lifanda lífi, en þínar eigin tekjur kunna að koma til frádráttar. Nánari upplýsingar eru á vefsvæðinu Työeläke.fi.

Barnalífeyrir

Almannatryggingastofnunin Kela greiðir eftirlifandi börnum undir átján ára aldri grunnlífeyri og uppbótarlífeyri. Ungmenni í námi fá grunnlífeyri fram að 21 árs aldri. Slíkur lífeyrir er einnig nefndur skólalífeyrir. Nánari upplýsingar eru á vefsvæði Kela.

Starfstengdir lífeyrissjóðir greiða eftirlifandi börnum undir 20 ára lífeyri. Upphæð lífeyrisins ræðst af þeim starfstengda lífeyri sem framfærsluaðili barnsins vann sér inn í lifanda lífi. Nánari upplýsingar eru á vefsvæðinu Työeläke.fi.

Aðrar tryggingar

Eftirlifandi makar og börn geta einnig fengið fjölskyldu- eða framfærslulífeyri úr tryggingum vegna slysa og umferðarslysa og slysa eða meiðsla á hermönnum eða sjúklingum. Eftirlifandi makar og börn geta einnig fengið eingreiðslu út úr hóplíftryggingu, ef hinn látni var á vinnumarkaði við andlátið. Nánari upplýsingar eru á vefsvæði Kela.

Hafi látinn maki eða framfærsluaðili verið með sérstaka lífeyristryggingu eða líftryggingu getur eftirlifandi maki eða barn einnig fengið bætur frá tryggingafélaginu. Fáðu nánari upplýsingar hjá viðeigandi tryggingafélagi. 

Fjölskyldulífeyrir frá öðrum löndum

Hafi látinn maki eða framfærsluaðili starfað í öðru norrænu landi á lífsleiðinni er hugsanlegt að eftirlifandi makar og börn eigi rétt á fjölskyldulífeyri þaðan. Nánari upplýsingar eru hér fyrir neðan.

Nánari upplýsingar

Spurning til Info Norden

Ef þú ert með spurningu skaltu fylla út eyðublaðið hérna:

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna