Andlát aðstandanda í Finnlandi

Í Finnlandi þarf að leggja fram skrá yfir allar eignir látinnar manneskju sem hafði fasta búsetu í Finnlandi fyrir andlátið. Í Finnlandi er innheimtur erfðafjárskattur af arfi.

Tilkynning um andlát í Finnlandi

Beri andlát að höndum á sjúkrahúsi eða annarri heilbrigðisstofnun í Finnlandi sér viðkomandi stofnun um að tilkynna finnsku þjóðskránni og öðrum stofnunum um andlátið. Beri andlát sviplega að skal tilkynna það lögreglu. Einnig þarf að tilkynna andlát sérstaklega til stofnana á borð við tryggingafélög og fjarskiptafyrirtæki sem hinn látni átti í viðskiptum við. Nánari upplýsingar eru á síðunni Suomi.fi.

Útför og útfararaðstoð í Finnlandi

Í Finnlandi gefa læknar út útfararleyfi. Útfararleyfi er ýmist veitt aðstandanda sem sér um útförina eða fulltrúa útfararstofu.

Þeir kirkjugarðar sem finnskir kirkjusöfnuðir hafa umsjón með eru almennir garðar, sem þýðir að fólk sem ekki tilheyrir viðkomandi söfnuði er jarðsett þar gegn sama gjaldi og safnaðarmeðlimir. Einnig er hægt að fá greftrunarstað í reit utan hins vígða hluta kirkjugarðsins.

Séu líkamsleifar brenndar þarf að jarða öskuna eða koma henni varanlega fyrir á einum stað innan árs frá brennslu. Ösku má aðeins koma fyrir utan kirkjugarðs ef eigandi jarðarinnar hefur gefið leyfi og ef líkbrennsluaðila hefur verið gerð skriflega grein fyrir staðsetningunni. Nánari upplýsingar veita svæðisskrifstofur stjórnsýslustofnunar finnska ríkisins (Aluehallintovirasto).

Tekjulágar fjölskyldur geta sótt um útfararaðstoð hjá félagsmálayfirvöldum á sínu búsetusvæði. Ættingjar hermanna sem hafa særst eða veikst í stríði Finnlands gegn öðru ríki geta fengið útfararaðstoð úr ríkissjóði Finnlands. Nánari upplýsingar eru á vefsvæði ríkissjóðs Finnlands.

Arfur, skrá yfir eignir dánarbús og erfðafjárskattur í Finnlandi

Erfðaréttur

Sé annað ekki tekið fram í erfðaskrá erfast eignir hins látna samkvæmt finnskum lögum um erfðarétt. Fyrstu arfþegar eru börn eða afkomendur hins látna. Sé hinn látni barnlaus rennur arfurinn til maka, sé hann fyrir hendi. Ef hvorki maka né börnum er til að dreifa rennur arfurinn til foreldra hins látna, systkina hans, foreldra foreldra hans eða systkina foreldranna. Erfðaréttur nær ekki lengra en til systkina foreldra hins látna. Þau geta fengið arf en það geta frændsystkini hins látna ekki.

Eftirlifandi maki á rétt á að búa áfram í sameiginlegu húsnæði, eigi hann ekki annað húsnæði sem hæft er til búsetu.

Látist einstaklingur án erfingja og erfðaskrár renna eignir hans til ríkissjóðs.

Erlendir ríkisborgarar eiga erfðarétt í Finnlandi til jafns við finnska ríkisborgara.

Nánari upplýsingar um erfðarétt eru á vefsvæði Finlex.

Skrá yfir eignir dánarbús

Ef hinn látni hafði fasta búsetu í Finnlandi við andlátið þarf að gera skrá yfir eignir dánarbús, þar sem gerð er grein fyrir eignum og skuldum hins látna og eftirlifandi maka hans. Skrá yfir eignir dánarbús þarf að vera tilbúin innan þriggja mánaða frá andláti og hana þarf að senda meðal annars skattayfirvöldum í Finnlandi. Hægt er að sækja um aukinn frest til að skila skrá yfir eignir dánarbús. Rökstuðningur skal fylgja umsókninni. Nánari upplýsingar eru á vefsvæði finnskra skattayfirvalda (Verohallinto).

Skrá yfir eignir dánarbús þarf að fylgja skrá yfir ættartengsl sem hægt er að panta hjá finnsku stofnuninni um stafræna væðingu og lýðfræðigögn (DVV). Slík skrá er einnig kölluð opinbert vottorð (virkatodistus). Hafi hinn látni tilheyrt lúthersk-evangelískri kirkju eða rétttrúnaðarkirkju þarf að panta opinbert vottorð frá kirkjunni fyrir það tímabil sem hinn látni tilheyrði kirkjunni. Nánari upplýsingar eru á vefsvæði finnsku stofnunarinnar um stafræna væðingu og lýðfræðigögn (DVV). 

Ef hinn látni bjó erlendis á lífsleiðinni þarf að panta opinbert vottorð frá öllum þeim löndum sem hann bjó í. Á vefsvæðinu „Finland abroad“ má finna greinargóðar upplýsingar um það hvernig sótt er um slíkt vottorð í norrænu löndunum.

Erfðafjárskattur

Greiða þarf erfðafjárskatt í Finnlandi af fé og eignum sem fólk erfir eða er ánafnað, ef arfláti eða erfingi hans bjó í Finnlandi við andlátið. Erfðafjárskattur er innheimtur á grundvelli skrár yfir eignir dánarbús og viðhengdra skjala.

Hlutfall erfðafjárskatts er reiknað út frá virði arfsins og tengsla erfingja við hinn látna. Nánari upplýsingar um erfðafjárskatt eru á vefsvæði finnskra skattayfirvalda.

Fjölskyldulífeyrir fyrir aðstandendur

Ef þú missir náinn aðstandanda getur þú fengið fjölskyldulífeyri að vissum skilyrðum uppfylltum. Nánari upplýsingar um fjölskyldulífeyri eru á síðunni Dánarbætur í Finnlandi.

Tilkynning um andlát til annars norræns lands

Ekki er víst að upplýsingar um andlát norræns ríkisborgara í Finnlandi berist sjálfkrafa til yfirvalda í öðru norrænu landi. Oftast er það sendiráð viðkomandi norræns ríkis í Finnlandi sem tilkynnir andlátið yfirvöldum í viðkomandi landi eftir að hafa fengið upplýsingar um það. 

Aðstandendur geta haft samband við sendiráð eftir þörfum og pantað dánarvottorð hjá finnsku stofnuninni um stafræna væðingu og lýðfræðigögn (DVV). Nánari upplýsingar eru á vefsvæði DVV.

Hér fyrir neðan eru nánari upplýsingar um hvernig tilkynna skal andlát norrænna ríkisborgara til mismunandi landa.