Dagvistun barna í Finnlandi

Með menntun og umönnun ungra barna er átt við skipulagða og markvissa umönnun og kennslu þar sem rík áhersla er lögð á kennslufræði. 

Í Finnlandi heyrir menntun og umönnun ungra barna undir hið almenna skólakerfi og ásamt  for- og grunnskólanámi myndar dagvistun ungra barna samhangandi heild sem leggur grunn að símenntun alla ævi. Öll börn undir grunnskólaaldri eiga rétt á dagvistun í Finnlandi. Dagvistun sem byggir á menntun og umönnun er mikilvægt stig fyrir þroska og nám ungra barna. Í Finnlandi byggist dagvistunarkerfið á lögum um menntun og umönnun ungra barna og á gildandi námsskrá.

Markmiðið með dagvistuninni er að efla vöxt, heilbrigði og vellíðan eins og hæfir aldri og þroska barnsins með aðstoð leikja, hreyfingar og lista.

Form dagvistunar í Finnlandi eru þrjú: leikskólar, dagforeldrar og opin dagvistunarúrræði, sem ganga meðal annars út á hópastarf og leiki. Foreldrar og forsjáraðilar geta valið það dagvistunarform sem hentar barni þeirra best. Ef á þarf að halda er einnig hægt að fá vistun á kvöldin eða allan sólarhringinn. Nánari upplýsingar eru á vefsvæði Fræðsluráðs í Finnlandi (Opetushallitus/Utbildningsstyrelsen).

Hafir þú áhuga á forskólanámi finnurðu nánari upplýsingar á síðunni Forskólanám í Finnlandi.

Sveitarfélög í Finnlandi bjóða börnum á aldrinum 0 til 6 ára upp á dagvistun í leikskólum, hjá dagforeldrum eða í opnum dagvistunarúrræðum. Sækja þarf um dagvistunarúrræði hjá sveitarfélagi fjórum mánuðum áður en dagvistun á að hefjast. Hægt er að fá pláss með tveggja vikna fyrirvara ef foreldrar fá vinnu eða komast inn í nám í Finnlandi. Nánari upplýsingar um dagvistun eru á þjónustuvefnum InfoFinland.fi.

Gjald fyrir dagvistun á vegum sveitarfélaga ræðst af tekjum fjölskyldunnar, fjölskyldustærð og því hvað barnið sækir dagvistun í margar klukkustundir á viku. Nánari upplýsingar um gjaldtöku vegna dagvistunar eru á vefsvæði finnska mennta- og menningarmálaráðuneytisins.

Dagvistun á vegum einkaaðila fyrir börn á aldrinum 0–6 ára getur verið á einkareknum leikskólum, hjá dagforeldrum eða í opnu dagvistunarúrræði. Þá er sótt um pláss beint hjá viðkomandi leikskóla, dagforeldri eða úrræði. 

Verð fyrir dagvistun á vegum einkaaðila er breytilegt. Hægt er að fá styrk frá Kela vegna dagvistunar á vegum einkaaðila og þá er slík dagvistun ekki endilega mikið dýrari en dagvistun á vegum sveitarfélags. 

Nánari upplýsingar um dagvistun á vegum einkaaðila færðu hjá því finnska sveitarfélagi sem þú býrð í eða ert að flytja til. Nánari upplýsingar um styrk vegna dagvistunar á vegum einkaaðila eru á vefsvæði finnsku almannatryggingastofnunarinnar (Kela). Ef fólk ræður manneskju til að sinna barni heima heyrir það ekki undir finnsk lög um dagvistun.

Dagvistun í Finnlandi er í boði á finnsku, sænsku og samísku. Einnig er hægt að fá dagvistun á rómamáli og börn sem tala táknmál geta fengið dagvistun á því máli. Að auki eru tvítyngd dagvistunarúrræði í boði á vegum sveitarfélaga og einkaaðila. Nánari upplýsingar eru á vefsvæði Fræðsluráðs í Finnlandi (Opetushallitus/Utbildningsstyrelsen).

Börn í dagvistun fá mat samkvæmt gildandi lögum og námsskrá á sviðinu. Almennt fá börnin þrjár máltíðir á dag: morgunmat, hádegismat og millimál. 

Litið er á mataruppeldi sem mikilvægan þátt í dagvistuninni og matmálstímunum þar. Markmið mataruppeldis er að stuðla að jákvæðri tengingu við mat og það að borða, auk þess að efla fjölbreyttar og heilnæmar matarvenjur. Börnunum er kennt að vera sjálfbjarga á matmálstímum og þau eru hvött til að borða fjölbreyttan mat í nægilegu magni. Daglegir matmálstímar fara fram í rólegu andrúmsloft þar sem börnin læra um matfrið og góða borðsiði og venjast því að sitja til borðs með öðrum. Nánari upplýsingar eru á vefsvæði Fræðsluráðs í Finnlandi (Opetushallitus/Utbildningsstyrelsen).

Þú átt rétt á styrk til að sinna barni heima ef barn þitt sem er eldra en sex ára en yngra en þriggja ára hefur ekki fengið úthlutað dagvistunarplássi hjá sveitarfélagi. Þú þarft ekki sjálf(t)(ur) að vera heima með barnið. Leyfilegt er að ráða einhvern annan til þess, svo sem ömmu, afa eða fagaðila. Nánari upplýsingar um styrk til að sinna barni heima eru á vefsvæði Kela.