Ökutæki í Finnlandi

Vilt þú ferðast til Finnlands á einkabíl, sendibíl eða mótorhjóli, eða flytja til Finnlands með ökutæki? Hér finnur þú upplýsingar um hvort þú þarft að láta skoða ökutækið, skrá það og greiða skatt af því í Finnlandi.

Um skráningu á Álandseyjum gilda sérstakar reglur sem hægt er að lesa um á síðunni Innflutningur ökutækja til Álandseyja. Upplýsingar um ökuréttindi eru á síðunni Ökuréttindi í Finnlandi.

Þú getur komið á eigin bíl eða öðru ökutæki í frí til Finnlands án þess að þurfa að gera grein fyrir ökutækinu í tollinum eða greiða af því skatt. Ökutækið þarf að hafa gilda ökutækjatryggingu frá því landi sem það er skráð í. 

Athugaðu að þú mátt ekki lána ökutækið manneskju sem býr í Finnlandi. 

Nánari upplýsingar eru á vefsvæðum finnska tollsins og skattsins.

Ef þú hefur fasta búsetu í öðru landi en Finnlandi máttu nota ökutæki skráð í öðru landi til að ferðast um Finnland í sex mánuði að hámarki án þess að gera þurfi grein fyrir ökutækinu í tolli eða greiða af því skatta. Hægt er að sækja um framlengingu til viðbótar við þessa sex mánuði. 

Athugaðu að almennt getur fólk með fasta búsetu í Finnlandi ekki notað ökutæki sem skráð er í öðru landi án þess að greiða af því skatt. Nánari upplýsingar veita finnsk skattayfirvöld; Verohallinto.

Ökutækið þarf einnig að hafa gilda ökutækjatryggingu. Athugaðu að ekki munu öll tryggingafélög vilja tryggja ökutæki ef eigandinn hefur ekki fasta búsetu í landinu.

Nánari upplýsingar eru á vefsvæðum finnska tollsins og skattsins.

Ef þú flytur til Finnlands og hefur ökutæki meðferðis þarft þú að láta skoða og skrá ökutækið í Finnlandi og greiða þar ökutækjaskatt. Ökutækjum sem koma frá norrænum löndum utan Evrópusambandsins, þ.e. Íslandi eða Noregi, þarf einnig að gera grein fyrir í tollinum en að vissum skilyrðum uppfylltum getur ökutæki sem komið er með í búferlaflutningum verið undanskilið innflutningsskatti og tolli.

Til þess að geta notað ökutæki þitt í Finnlandi allt frá flutningsdegi þarft þú að láta finnsk skattayfirvöld vita við komuna til landsins. Þú getur sent inn rafræna tilkynningu um að þú hyggist taka í notkun ökutæki sem þurfi að skrá í Finnlandi.

Nánari upplýsingar eru á heimasíðum finnskra skatta- og tollayfirvalda.

Ökutækjaskattur í Finnlandi

Þegar ökutæki hefur verið flutt til Finnlands þarf að gera sérstaka grein fyrir því gagnvart skattayfirvöldum (Verohallinto) innan 5 daga frá því að tilkynning um notkun ökutækisins í landinu hefur verið staðfest. Nánari upplýsingar um ökutækjaskatt eru á vefsvæði finnskra skattayfirvalda (Verohallinto).

Skoðun og skráning ökutækja í Finnlandi

Áður en hægt er að skrá ökutæki í Finnlandi þarf það að gangast undir skráningarskoðun á skoðunarstað sem sér um upphafsskráningar ökutækja. Við skráningarskoðun þarf að framvísa skráningarskírteini frá upprunalandinu þar sem m.a. kemur fram hvenær ökutækið var fyrst skráð eða tekið í notkun. Að skráningu lokinni færð þú skráningarvottorð og finnskar númeraplötur.

Nánari upplýsingar um skráningarskoðun, staði þar sem slíkar skoðanir eru framkvæmdar og um skráningu ökutækja veitir finnska samgöngustofan (Liikenne- ja viestintävirasto / Traficom).

Í Finnlandi er kveðið á um umferðarreglur í umferðarlögunum. Hér eru nokkrar af helstu umferðarreglunum í Finnlandi:

• Hraðatakmarkanir: Í þéttbýli er almennur hámarkshraði 50 km/klst nema annað sé tekið fram. Utan þéttbýlis er hámarkshraði almennt 80 km/klist. Á hraðbrautum er hámarkshraði vanalega 100 km/klst eða 120 km/klst á sumrin en á veturna fer hann niður í 80 eða 100 km/klst.
• Leyfilegt vínandamagn í blóði ökumanna: Í Finnlandi er leyfilegt vínandamagn í blóði undir stýri 0,5 ‰.
• Öryggisbelti og bílstólar: Öllum farþegum í bíl er skylt að nota öryggisbelti, einnig í aftursætum. Samkvæmt finnskum lögum þurfa börn að nota öryggisbúnað í bíl þangað til þau hafa náð 135 sentimetra hæð.
• Ökuljós: Kveikt skal vera á ökuljósum allra ökutækja allan sólarhringinn, líka að degi til. 
• Forgangur: Umferð frá hægri nýtur forgangs nema umferðarmerki segi til um annað. 
• Símanotkun: Meðan ekið er má aðeins nota farsíma með handfrjálsum búnaði. Bannað er að nota síma sem haldið er á meðan ekið er.

Nánari upplýsingar um finnsk umferðarlög eru á vefsvæði Finlex og upplýsingar um umferðarreglur eru á vefsvæði finnsku umferðarstofunnar (Liikenneturva/Trafikskyddet).

Nota þarf vetrardekk, sé það nauðsynlegt sökum veðurs eða færðar, í nóvember, desember, janúar, febrúar og mars. Á því tímabili sem skylt er að nota vetrardekk þarf mynstursdýpt hjólbarðanna að vera að lágmarki 3 millimetrar. Vetrardekkin geta ýmist verið negld eða ónegld.

Nagladekk er leyfilegt að nota utan tilskilins vetrardekkjatímabils ef ástæða er til sökum veðurs eða færðar. Nánari upplýsingar á vefsvæði finnsku umferðarstofunnar (Liikenneturva).

Fólk með fötlun getur fengið skattaívilnanir vegna ökutækja, auk ýmissa annarra styrkja og afslátta til að greiða fyrir hreyfanleika. Nánari upplýsingar eru á síðunni Aðstoð vegna hjálpartækja fatlaðra og þjónusta við fatlaða í Finnlandi.

Sé bifreið skráð í Finnlandi þarf ekki að skrá hana í öðru norrænu landi meðan á skammtímadvöl þar stendur. Mismunandi reglur gilda um það í norrænu löndunum hve lengi má aka bifreið án þess að skrá hana inn í landið. Lestu meira um reglurnar í hverju landi fyrir sig með því að smella á tenglana hér að neðan. 

Ökutæki þarf alltaf að hafa gilda ökutækjatryggingu. Athugaðu að ekki munu öll tryggingafélög vilja tryggja ökutæki ef eigandinn hefur ekki fasta búsetu í landinu.