Karólína Eiríksdóttir

MagnusMaria er ópera eftir Karólínu Eiríksdóttur (f. 1951), samin við texta eftir Katarinu Gäddnäs. Óperan segir sanna sögu frá 17. öld um Maríu Johansdotter / Magnús Johansson, en umfjöllunarefnið snertir mannréttindi — einkum og sér í lagi réttinn til að velja eigið kyngervi og eigið starf. Efnið hefur ennþá sterka tilvísun og skírskotun nú á dögum, og orkumikið tónmál Karólínu Eiríksdóttur segir þessa mikilvægu sögu á kröftugan og tjáningarríkan hátt.

Karólína nam við Tónlistarskólann í Reykjavík, þar sem Þorkell Sigurbjörnsson var kennari hennar í tónsmíðum. Hún hélt áfram námi í University of Michigan í Ann Arbor með George Wilson og William Albright sem tónsmíðakennara, og tók meistaragráðu í tónsmíðum, tónlistarsögu og tónlistarfræði. Síðan 1979 hefur hún verið athafnasöm í íslensku tónlistarlífi sem tónskáld og kennari.