Víkingur Heiðar Ólafsson

Víkingur Heiðar Ólafsson píanóleikari hefur fangað huga bæði tónlistarunnenda og gagnrýnenda með djúphugulum tónlistarflutningi sínum. Upptökur hans fyrir Deutsche Grammophon nálgast milljón spilanir á streymisveitum og hafa aflað honum fjölda verðlauna. Víkingur hefur meðal annars fengið Fálkaorðuna og Útflutningsverðlaun forseta Íslands. 

Plötur hans hafa hlotið mikið lof gagnrýnenda, meðal annars Philip Glass: Piano Works (2017), Johann Sebastian Bach (2018) og J.S. Bach: Goldberg Variations (2023) sem hann hlaut Grammy-verðlaun fyrir. 

Veturinn 2023–2024 helgaði Víkingur tónleikaferðalagi um heiminn þar sem hann lék Goldberg-tilbrigðin. Dagskrá hans nú í vetur er býsna fjölbreytt og inniheldur meðal annars tónleikaferðalag um Evrópu ásamt The Cleveland Orchestra, London Philharmonic Orchestra og Tonhalle-Orchester Zürich, auk þess sem Víkingur mun koma fram ásamt Berlínarfílharmóníunni á tónlistarhátíðinni BBC Proms. Vorið 2025 flytur hann þrjár síðustu sónötur Beethovens á fjölda tónleika í Bandaríkjunum og Evrópu. 

Hin virta útvarpsstöð Classic FM setti Víking á lista yfir 25 bestu píanóleikara allra tíma og skipaði honum í 16. sæti, beint á eftir Mozart sem lenti í 15. sæti.

Þetta er í þriðja sinn sem Víkingur Heiðar er tilnefndur til tónlistarverðlaunanna en hann var einnig tilnefndur árin 2017 og 2021.