Maija Hurme

Myndabókin Kaikki löytämäni viimeiset eftir Maiju Hurme er hjartnæmt og marglaga listaverk og fjörug myndabók sem fær börn til að líta umheiminn nýjum augum. Heildarhugsun bókarinnar hverfist um síðustu hlutina í lífinu – þær stundir þegar einhver verður síðastur, þegar eitthvað er prófað í síðasta sinn eða það síðasta vantar.

Við fyrstu sýn minnir bókin á myndaalbúm þar sem safnað hefur verið saman svipmyndum af mikilvægustu stundunum í lífi barns. Þessi að því er virðist stöku augnablik byrja þó að tvinnast saman í heildstætt og heimspekilegt ferðalag inn í reynsluheim barnsins, þar sem síðasta bleyjan og síðasti súkkulaðimolinn á borðinu öðlast í það minnsta jafnt vægi á við síðustu nóttina uppi í hjá pabba og mömmu.

Úr verður skerandi og skemmtileg heild, full af gráti og hlátri, þar sem formið er hluti frásagnarinnar og sögunnar. Svipmyndum úr lífi barns er brugðið upp í myndum og orðum og útkoman minnir á sjónræn ljóð sem opna glugga í margar mismunandi áttir. Lífið fer smám saman að minna á samansafn skammvinnra hversdagsatvika og mikilvægra augnablika sem virðast þó ekki merkingarbær fyrr en seinna meir. Bókin hjálpar barninu að skilja og túlka þær blæbrigðaríku og tvíbentu tilfinningar sem óhjákvæmilega fylgja uppvextinum. Þetta er gert á furðunæman og skarpskyggnan hátt sem ber vott um djúpa virðingu fyrir barninu.

Kaikki löytämäni viimeiset brýtur upp hina hefðbundnu myndabókarfrásögn og veitir lesendum af öllu tagi, börnum jafnt sem fullorðnum, þann möguleika að finna sjálf sig á síðum bókarinnar. Blæbrigðaríkar línur dregnar með vatnslitapensli og blýanti verða að myndum sem bjóða lesandanum að halda áfram að segja sögurnar og bæta við þær eigin minningum og reynslu. Í bókinni renna myndskreytingar og texti óaðfinnanlega saman í eina heild sem fær lesandann til að opna bókina aftur og aftur og finna eitthvað nýtt við hvern lestur.

Maija Hurme hefur myndskreytt fjölda barnabóka og ljóðabóka. Margar þeirra hafa komið út samtímis á finnsku og sænsku. Bókin Varjostajat/Skuggorna (2018) eftir hana og Anssi Hurme var tilnefnd til Finlandia-verðlaunanna í flokki barna- og unglingabóka. Kaikki löytämäni viimeiset er önnur bók Maiju Hurme þar sem bæði texti og myndir eru eftir hana.