Námskeið í norsku eða öðrum Norðurlandamálum

Sem ríkisborgari norræns lands áttu að meginreglunni til ekki rétt á ókeypis norskunámi. Ef þig langar til að læra norsku þarftu því að finna fræðslumiðstöð sem heldur námskeið og þú greiðir fyrir námskeiðið úr eigin vasa.

Norskuprófið gefur formlega staðfestingu á norskukunnáttu og getur gagnast þegar sótt er um vinnu eða háskólanám. Þú getur lesið nánar um norskunám og norskupróf hjá stjórnsýslusviði æðri menntunar og fagkunnáttu (HK-Dir). 

Ef þig langar til að læra norsku í Noregi vegna þess að þú ætlar að vinna, stunda nám eða setjast að í landinu, eða einfaldlega vegna þess að þú hefur áhuga á norskunni, þá byrjarðu á því að hafa samband við sveitarfélagið sem þú býrð í eða hyggst flytjast til. Mörg sveitarfélög bjóða upp á norskunám fyrir fullorðna. Þú getur einnig keypt þér námskeið hjá einkareknum fræðslumiðstöðvum. 

Eins er hægt að læra norsku á netinu. Skoðaðu Norwegian on the Web sem er ókeyptis námskeið í umsjón Norges Teknisk-Naturvitenskapelige Universitet (NTNU). Þú getur líka notað leitarorðin „Norskkurs på nett“ eða bara „Norskkurs“ á netinu.

Háskólar bjóða útlensku námsfólki upp á norskunámskeið. Námskeiðin heita „Norsk for utenlandske studenter“ eða eitthvað í þá veruna. Lestu um skólana og athugaðu hvaða kröfur eru gerðar til að geta sótt námskeið þar.

Ef þú hefur áhuga á að læra annað norrænt tungumál í Noregi hefurðu samband við námsstofnanir sem bjóða upp á tungumálakennslu, lýðháskóla eða einkareknar fræðslumiðstöðvar. Þú getur líka beðið sendiráð lands þíns í Ósló um ábendingar um aðila sem bjóða upp á námskeið.