Styrkir Norrænu ráðherranefndarinnar til menningar og lista

Verkefni Norrænu menningargáttarinnar er að efla norrænt menningarsamstarf fyrir börn og ungmenni og í borgarasamfélaginu. Í boði eru styrkir, meðal annars til menningar- og listaverkefna á Norðurlöndum, samstarfs norrænna barna og ungmenna um samfélags- og menningarleg verkefni, eflingar á þekkingu barna og ungmenna á norrænum tungumálum og menningu og samstarfs og tengslaneta aðila borgarasamfélagsins á Norðurlöndum. 

Hlutverk Norræn-baltnesku ferðaáætlunarinnar er að efla samstarf, þekkingarmiðlun og samstarfsnet listafólks og aðila í menningarlífi á Norðurlöndum og í Eystrasaltsríkjunum. Sjóðurinn býður styrki vegna listamannadvala, ferðastyrki og styrki til samstarfsverkefna og tengslaneta.  Norræna menningargáttin hefur umsjón með áætluninni.

Hlutverk Norræna menningarsjóðsins er að efla menningarsamstarf milli norrænu landanna sem og Norðurlanda við önnur lönd heim. Sjóðurinn veitir meðal annars styrki til rannsóknarferða, þróunar tengslaneta og faglegrar ráðgjafar, sem og verkefnastyrki til þróunar og stækkunar lista- og menningarverkefna á Norðurlöndum og alþjóðlega.  

Norræna stofnunin á Grænlandi vinnur að eflingu norrænna lista og menningar á Grænlandi. Stofnunin hefur umsjón með styrkjum til lista- og menningarverkefna á Norðurlöndum sem eiga erindi til Grænlendinga.

Samaráðið er stofnun sem vinnur að því að efla og gæta hagsmuna Sama þvert á landamæri. Samaráðið hefur umsjón með styrkjum til eflingar og þróunar samískrar menningar á Norðurlöndum. 

Samisk Kunstnerråd vinnur að eflingu hagsmuna hinna sex aðildarsamtaka sinna á sviði menningar. Ráðið hefur umsjón með styrkjum fyrir samískt listafólk og stofnanir vegna samstarfsverkefna á Norðurlöndum.