Bergrún Snæbjörnsdóttir

Bergrún Snæbjörnsdóttir er tónskáld og fjölfaglegur listamaður sem blandar saman sígildri samtímatónlist, tilraunakenndri raftónlist og þáttum úr sviðslistum í verkum sínum. Stíll hennar er stilltur en ákafur og áhersla er lögð á gagntakandi hlustunarrými og nákvæma hljóðmyndun.  

Bergrún spilar á horn (og var ein þeirra málmblásara sem fylgdu Björk á tónleikaferðalagi árið 2007), er með meistaragráðu í tónsmíðum frá Mills College og einnig menntuð í hljóðlist. Hljómsveitir og tónlistarhátíðir á heimsmælikvarða hafa pantað verk hjá henni.  

Intraloper (2026) var frumflutt á Myrkum músíkdögum af Bergrúnu sjálfri og hinum virta þýska málmblásarakvartett Apparat og þar kom skýrt í ljós hve fær hún er í stemningsríkum hljóðmyndum og fágaðri tónstýringu. Við flutninginn var viðkvæmum og ískyggilegum hljóðheimi fléttað saman við lágstemmd og breytileg mótíf svo að úr varð náið en nístandi verk sem minnti dálítið á hljóðláta hávaðalist. Hárnákvæm blæbrigði í hljóðstyrk og mikil næmni fyrir rýminu hrifu áheyrendur með sér í heillandi ferðalag þar sem heildaráhrifin voru viðkvæm og róleg en jafnframt spennt og áleitin. Þetta vandlega mótaða verk hefur fest Bergrúnu í sessi sem eina merkustu röddina á sviði íslenskrar framúrstefnu.