Koirat eivät käytä housuja – Finnland

Eiginkona Juha drukknaði í slysi. Mörgum árum síðar er hann enn dofinn og á erfitt með að tengjast fólki. Það breytist allt þegar hann hittir dómínu að nafni Mona. Þetta er saga full af svartri kímni, um missi, ást og hinn ljúfa sársauka sem fylgir því að vera til.

Jukka-Pekka Valkeapää er kvikmyndagerðarmaður af guðs náð. Í þeim heimum sem hann skapar eru allir fletir kvikmyndalistarinnar nýttir. Koirat eivät käytä housuja (Hundar ganga ekki í buxum) fjallar um það að jafna sig eftir missi ástvinar og er um leið rómantísk en óhefðbundin ástarsaga. Í stað þess að bjóða auðvelda útgönguleið skorar Valkeapää á áhorfendur að glöggva sig á hinum leyndu fylgsnum mannshugans.

J-P Valkeapää (1977) lærði kvikmyndaleikstjórn við kvikmynda- og sjónvarpsdeild Hönnunar- og listaháskólans í Helsingfors. Fyrsta mynd hans í fullri lengd, Muukalainen (Aðkomumaðurinn), var þróuð hjá Cannes Cinéfondation, heimsfrumsýnd á Venice Days 2008 og vann til Dragon-verðlauna í Gautaborg sem besta norræna myndin 2009.

Næsta kvikmynd Valkeapää, He ovat paenneet (Þau eru flúin), var sýnd á hátíðum í Feneyjum og Toronto og vann fern Jussi-verðlaun í heimalandinu, meðal annars sem besta mynd og fyrir bestu leikstjórn, og var tilnefnd til kvikmyndaverðlauna Norðurlandaráðs 2015. Þriðja mynd hans í fullri lengd, Koirat eivät käytä housuja, var heimsfrumsýnd á Directors‘ Fortnight í Cannes árið 2019. Hún hlaut verðlaun sem besta myndin á Fantastic Fest-hátíðinni í Austin og á alþjóðlegu furðu- og hryllingskvikmyndahátíðinni SITGES, í Katalóníu.  

Juhana Lumme er handritshöfundur, rithöfundur, kvikmyndaleikstjóri og skopteiknari. Hann útskrifaðist með meistaragráðu frá Lista- og hönnunarháskólanum í Helsingfors. Mynd hans úr náminu, High Hopes í leikstjórn Mazdak Nassir, var útnefnd besta myndin á stuttmyndahátíðinni í Tampere og útskriftarhandrit hans fyrir mynd J-P Valkeapää, Koirat eivät käytä housuja, var heimsfrumsýnd á Directors’ Fortnight í Cannes.

Aleksi Bardy (1970) er gamalreyndur handritshöfundur, leikstjóri, framleiðandi, stofnandi og framkvæmdastjóri hjá hinu virta framleiðslufyrirtæki Helsinki-filmi.Hann hefur komið að yfir 55 kvikmyndum, heimildarmyndum og sjónvarpsþáttaröðum sem framleiðandi og yfirframleiðandi og hafa margar þeirra hlotið mikið lof í heimalandinu og á alþjóðavettvangi. Hann hefur unnið náið með Dome Karukoski (Tom of Finland), JP Siili (Ganes) og framleitt þrjár myndir eftir J.P. Valkeapää, Muukalainen, He ovat paenneet og Koirat eivät käytä housuja.

Nú síðast framleiddi hann Teräsleidit (Stálstelpurnar) eftir Pamelu Tola, sem sló í gegn, var yfirframleiðandi norsk-dönsku þáttaraðarinnar Mellom oss og meðframleiðandi sænsku þáttaraðarinnar Maskineriet, sem sló í gegn á Viaplay. Næsta stóra myndin sem hann framleiðir er Tove eftir Zaida Bergroth, sem byggð er á ævi Tove Jansson.Sem handritshöfundur hefur Bardy unnið að þáttaröðum á borð við hina vinsælu Salatut elämät (Dulin líf) (1999) fyrir MTV3 og Dirigenten (2018) fyrir C More/TV4-StudioCanal Hann skrifaði handritið að Levottomat (Eirðarlaus) (2000) eftir Aku Louhimies og nokkrum vinsælustu myndum Dome Karukoski, svo sem Kielletty hedelmä (Forboðnir ávextir) (2009), Leijonasydän (Ljónshjarta) (2013) og Tom of Finland (2017).

Hin eistneska Helen Vinogradov (1987) útskrifaðist frá Baltneska kvikmynda- og fjölmiðlunarskólanum og lærði kvikmyndaframleiðslu við kvikmyndadeild Aalto-háskólans í Helsingfors. Hún var listrænn stjórnandi stuttmyndahátíðarinnar Sleepwalkers í Tallinn og hefur framleitt fjölda auglýsinga, tónlistarmyndbanda og stuttmynda.

Frá árinu 2014 hefur hún unnið sem aðstoðarframleiðandi fyrir Helsinki-filmi og stofnaði meðfram því framleiðslufyrirtækið Vincent Films í Eistlandi.

Árið 2018 gekk hún til liðs við Helsinki-filmi sem fastráðinn framleiðandi. Hún var aðstoðarframleiðandi Miami eftir Zaida Bergroth og Tom of Finland eftir Dome Karukoski, yfirframleiðandi þáttaraðanna Aktivistit (Aktívistarnir) (2019) og Maskineriet og hinnar vinsælu myndar Teräsleidit. Koirat eivät käytä housuja í leikstjórn J-P Valkeapää er fyrsta myndin í fullri lengd sem hún framleiðir.

Titill á frummáli: Koirat eivät käytä housuja

Enskur titill: Dogs Don’t Wear Pants

Leikstjórn: Jukka-Pekka Valkeapää

Handritshöfundar: Jukka-Pekka Valkeapää, Juhana Lumme

Aðalhlutverk: Pekka Strang, Krista Kosonen, Ester Geislerová, Ilona Huhta

Framleiðendur: Aleksi Bardy, Helen Vinogradov

Framleiðslufyrirtæki: Helsinki-filmi

Lengd: 105 mínútur

Dreifing í heimalandi: Nordisk Film Distribution

Alþjóðleg dreifing: The Yellow Affair