Húsnæðisbætur í Danmörku

Ef þú býrð í leiguhúsnæði með eigin eldhúsi getur þú hugsanlega fengið húsnæðisbætur í Danmörku. Hve mikið þú getur fengið fer meðal annars eftir leigunni, stærð húsnæðisins, tekjum og eignum heimilisins og því hve mörg börn og fullorðnir búa í húsnæðinu. Ef þú býrð í búseturéttar- eða eignarhúsnæði getur þú í sumum tilvikum fengið húsnæðisbætur sem lán.

Getur þú fengið húsnæðisbætur vegna leiguhúsnæðis í Danmörku?

Ef þú býrð í leiguhúsnæði með séreldhúsi áttu kannski rétt á húsnæðisbótum.

Ef þú býrð með öðrum er aðeins einn einstaklingur á heimilinu sem getur fengið húsnæðisbætur. Húsnæðisbæturnar eru greiddar til þess sem sækir um, eða til húsnæðisfélagsins, sem dregur fjárhæðina frá leigunni.

Ef þú býrð í framleiguhúsnæði gilda almennar reglur um húsnæðisbætur. Þú þarft þó að ganga úr skugga um að leigusalinn hafi tilkynnt flutning sinn til þjóðskrár því annars gætu tekjur hans haft áhrif á húsnæðisbæturnar.

Réttur þinn til húsnæðisbóta og fjárhæð þeirra fer meðal annars eftir leigunni, tekjum og eignum heimilisins, stærð húsnæðisins og því hve margir búa í húsnæðinu.

Sótt er um húsnæðisbætur á vefnum borger.dk.

Þú skalt láta Udbetaling Danmark vita ef aðstæður þínar breytast. Það á til dæmis við ef tekjur þínar, leiga eða eignir breytast, ef einhver flytur inn á heimilið eða út af því, ef þú flytur eða ef þú dvelur lengri tíma annars staðar, til dæmis erlendis.

Sérstakar reglur gilda sem geta þýtt að þú getir fengið hærri húsnæðisbætur ef þú býrð í húsnæði sem þér hefur verið úthlutað, færð sólarhringsaðstoð eða ert verulega hreyfihömluð/hreyfihamlaður. Sjá nánar undir „Særligt for dig“ á borger.dk um húsnæðisbætur.

Ef þú færð ellilífeyri, örorkulífeyri eða lífeyri fyrir eldri borgara getur þú í sumum tilvikum sótt um húsnæðisbætur sem lán vegna búseturéttar- eða eignarhúsnæðis. Þetta gildir einnig ef þú ert verulega hreyfihömluð/hreyfihamlaður eða færð notendastýrða persónulega aðstoð. Þú getur einnig fallið undir reglurnar ef þú býrð í Danmörku og færð sambærilegan erlendan lífeyri sem fellur undir reglur um samræmingu almannatrygginga.

Nánari upplýsingar um lán og reglurnar eru á vef borger.dk um húsnæðisbætur, undir „Særligt for dig“.

Getur þú fengið lán fyrir innborgun í Danmörku?

Ef þú flytur inn í almennt leiguhúsnæði sem var byggt og tekið í notkun eftir 1. apríl 1964 getur þú sótt um lán hjá sveitarfélaginu fyrir innborgun leigjanda. Hægt er að veita lán til innborgunar á íbúðum og einstaklingsherbergjum. Þú getur þó ekki sótt um lán ef þú flytur í almennt leiguhúsnæði fyrir ungmenni án séreldunaraðstöðu. Nánari upplýsingar á vefslóðinni borger.dk.

Nánari upplýsingar um húsnæðisbætur í Danmörku