Krafa um vegabréf þegar ferðast er til Danmerkur

Ef þú ert ríkisborgari í norrænu landi og ferðast til Danmerkur frá öðru norrænu landi þarftu að jafnaði ekki vegabréf. Þú getur þó þurft að framvísa skilríkjum og staðfesta að þú sért norrænn ríkisborgari.

Ef þú ert ríkisborgari í ESB-, EES- eða Schengenlandi þarftu að hafa með þér vegabréf eða skilríki. Ef þú ert ríkisborgari í öðru landi þarftu að hafa með þér vegabréf og í sumum tilvikum einnig vegabréfsáritun eða dvalarleyfi.

Þarf maður vegabréf til að ferðast til Danmerkur?

Hér að neðan getur þú lesið hvaða skilríki þú þarft að hafa meðferðis þegar þú ferðast til Danmerkur. Reglurnar fara meðal annars eftir ríkisfangi þínu, hvaðan þú ferðast og hvort þú ferðast með börn.

Nánari upplýsingar má nálgast á vefsvæði dönsku lögreglunnar, í norræna vegabréfasamningnum og á Ny i Danmark.

Norræna vegabréfasambandið felur alla jafna í sér að norrænir ríkisborgarar þurfi ekki að framvísa vegabréfi þegar ferðast er á milli norrænna landa.

Landamæraeftirlit hefur tímabundið verið tekið upp að nýju við komu til nokkurra norrænna landa. Einnig getur farið fram slembieftirlit við landamærin.

Það þýðir að þú kannt að þurfa að færa sönnur á að þú sért norrænn ríkisborgari. Aðeins vegabréf og nafnskírteini útgefin af löndunum innihalda upplýsingar um þjóðerni.

Þótt þú sem norrænn ríkisborgari hafir rétt til að ferðast til Danmerkur án vegabréfs þarftu að geta framvísað skilríkjum þegar þess þarf. Lögreglan mælist því til þess að norrænir ríkisborgarar hafi meðferðis einhver af eftirfarandi skilríkjum:

• Vegabréf
• Ökuskírteini
• Nafnskírteini með mynd. Finnsk, norsk og sænsk nafnskírteini eru samþykkt sem ferðaskilríki við komu til Danmerkur.

Ef þú ferðast með flugi, ferju, rútu eða lest ættir þú einnig að kanna hvaða skilríki flutningsaðilinn krefst. Flutningsaðilinn getur haft eigin kröfur, jafnvel þótt þú sem norrænn ríkisborgari þurfir ekki vegabréf þegar þú ferðast til Danmerkur frá öðru norrænu landi.

Ef þú býrð í öðru norrænu landi og vilt ferðast til Danmerkur með barnið þitt þarftu að ganga úr skugga um að ferðin geti farið fram með lögmætum hætti. Það eru reglurnar í landinu þar sem barnið býr sem ráða því hvort þú megir ferðast með barnið til Danmerkur. Þetta gildir einnig um frí.

• Börn sem ferðast með foreldri eða forráðamanni: Krafan um eigin skilríki á ekki við um norræna ríkisborgara undir 18 ára aldri ef viðkomandi ferðast með foreldri eða forráðamanni sem er norrænn ríkisborgari og getur framvísað skilríkjum. Sjá „Norrænir ríkisborgarar eldri en 18 ára sem ferðast til Danmerkur frá öðru norrænu landi“ hér fyrir ofan.
• Norrænir ríkisborgarar undir 18 ára aldri sem ferðast án foreldris eða forráðamanns þurfa að sýna fram á þjóðerni sitt rétt eins og fullorðnir. Lögreglan mælist því til þess að barnið hafi vegabréf meðferðis.
• Skólaferðalög og slíkt: Sérstakar reglur gilda um nemendur undir 18 ára aldri sem taka þátt í skólaferðalagi á vegum opinbera skólakerfisins eða með frístundaheimili. Í skólaferðalagi þarf kennari eða annar einstaklingur yfir 18 ára aldri að fara fyrir hópnum og hafa undir höndum lista yfir alla nemendur og kennara sem taka þátt í ferðinni ásamt gögnum um tilgang og ástæðu ferðarinnar.

Þú getur fengið lista vegna skólaferðar hjá Útlendingastofnun Danmerkur eða hjá dönsku lögreglunni. Kennararnir sem fylgja hópnum þurfa sjálfir að uppfylla skilyrðin fyrir komu til Danmerkur.
 

Ef þú er ríkisborgari í norrænu landi og kemur til Danmerkur frá landi utan Norðurlanda þarftu að hafa meðferðis vegabréf eða nafnskírteini með mynd, útgefið af löndunum. Finnsk, norsk og sænsk nafnskírteini eru samþykkt sem ferðaskilríki við komu til Danmerkur. Börn þurfa einnig að hafa eigið vegabréf eða nafnskírteini.

Ef þú ert ríkisborgari í ESB-, EES- eða Schengenlandi utan Norðurlanda þarftu að hafa meðferðis vegabréf eða nafnskírteini þegar þú ferðast til Danmerkur. Börn þurfa einnig að hafa eigið vegabréf eða nafnskírteini.

Almennt þarftu ekki að framvísa ferðaskilríkjum þegar þú ferð yfir innri landamæri á Schengensvæðinu. Löndin geta þó tímabundið tekið upp landamæraeftirlit að nýju eða framkvæmt slembieftirlit. Í slíkum tilvikum þarftu að geta framvísað skilríkjum þegar þú ferð yfir landamærin.

Ef þú ferðast til ESB- eða Schengenlands frá landi utan Schengen þarftu að hafa meðferðis gilt vegabréf.

Ef þú ert ríkisborgari í landi utan Norðurlanda, ESB, EES og Schengen þarftu að hafa vegabréf meðferðis þegar þú ferðast til Danmerkur.

• Ef þú ert ríkisborgari í landi sem er undanþegið vegabréfsáritun þarftu ekki vegabréfsáritun til að ferðast til Danmerkur. Þú mátt dvelja í Danmörku í allt að 90 daga á 180 daga tímabili án vegabréfsáritunar eða dvalarleyfis.
• Ef þú ert ekki ríkisborgari í landi sem ekki er krafist vegabréfsáritunar frá þarftu að hafa vegabréf og vegabréfsáritun eða dvalarleyfi. Þú getur mest fengið vegabréfsáritun til að dveljast í Danmörku í 90 daga á 180 daga tímabili. Vegabréfið þarf að vera gilt í að minnst kosti þrjá mánuði eftir fyrirhugaða brottför úr landinu og ekki mega vera meira en tíu ár frá útgáfu þess.
• Ef þú ert með dvalarleyfi í Danmörku geturðu ferðast um Schengensvæðið án vegabréfsáritunar í að hámarki 90 daga á 180 daga tímabili. Þú þarft að hafa vegabréfið og dvalarleyfið meðferðis. Ef þú ert með dvalarleyfi í öðru Schengenlandi geturðu ferðast til Danmerkur án vegabréfsáritunar í 90 daga á 180 daga tímabili. Þessi tímamörk eiga við um uppsafnaða dvöl á Schengensvæðinu í heild en ekki aðeins í einu landi.

Nánar á Ny i Danmark.