Stéttarfélög í Danmörku

Stéttarfélög gegna lykilhlutverki á dönskum vinnumarkaði þar sem þau standa vörð um hagsmuni félagsmanna sinna og gera sameiginlega kjarasamninga við atvinnurekendur. Kjarasamningar kveða á um launa- og starfskjör og tryggja viðunandi vinnuaðstæður.

Stéttarfélögin vinna að því að tryggja góð skilyrði á vinnumarkaði og að allt starfsfólk heyri undir kjarasamninga. Þetta fellst meðal annars í:

• samningum um launa- og ráðningakjör
• aðstoð í málum varðandi vinnuumhverfi, orlof, fæðingarorlof, uppsagnir og fleira
• ráðgjöf vegna árekstra á vinnustað
• upplýsingagjöf um réttindi og skyldur starfsmanna.

Stéttarfélögin veita ráðgjöf ef upp kemur vandi í tengslum við starfskjör.

Stéttarfélögin mynda starfsgreinasambönd, sem aftur mynda landssambönd starfsgreinasambanda. Landssamböndin semja um almenn kjör við samtök atvinnurekenda og eru fulltrúar atvinnugreina á landsvísu.

Tvö stærstu landssamböndin í Danmörku eru:

• Fagbevægelsens Hovedorganisation (FH): Heldur meðal annars utan um faglært, ófaglært og óbreytt starfsfólk bæði hjá hinu opinbera og á einkamarkaði
• Akademikerne (AC): Heldur utan um háskólamenntað starfsfólk bæði hjá hinu opinbera og á einkamarkaði

Ef þú ert í vafa um það hvaða stéttarfélagi eða starfsgreinasambandi starfsgrein þín tilheyrir getur þú leitað ráð hjá landssamböndunum.

Aðilar að dönskum stéttarfélögum greiða félagsgjöld. Sem launþegi getur þú dregið hluta félagsgjaldanna frá skatti. Alla jafna kemur frádrátturinn sjálfkrafa fram á skattframtali hjá Skattestyrelsen.

Á vefnum skat.dk má fá frekari upplýsingar, m.a. um hámark frádráttarins.