Styrkur vegna hjálpartækja í Danmörku

Ef þú dvelst löglega í Danmörku kanntu að eiga rétt á styrk vegna hjálpartækja. Alla jafna er það sveitarfélagið sem fer yfir umsókn þína og úrskurðar um hana. Yfirleitt þarftu að sækja um áður en þú kaupir hjálpartæki.

Hvaða hjálpartæki eru í boði fyrir daglegt líf?

Ef þú eða barnið þitt er með líkamlega eða andlega fötlun geturðu leitað til sveitarfélagsins eftir hjálpartæki eða styrk til að kaupa það.

Sveitarfélagið getur veitt styrki vegna hjálpartækja, sérstakra vara og breytinga á húsnæði ef þú býrð við varanlega líkamlega eða andlega fötlun. Markmiðið er að þú getir lifað eins sjálfstæðu lífi og hægt er.

Greiningin sjálf hefur ekki úrslitaáhrif heldur áhrif fötlunarinnar á daglegt líf þitt. Fötlunin getur verið meðfædd eða tilkomin vegna veikinda eða slyss.

Sveitarfélagið skal veita styrk til hjálpartækis ef hjálpartækið getur að verulegu leyti:

• dregið úr varanlegum áhrifum fötlunarinnar
• auðveldað þér daglegt líf á heimilinu
• talist nauðsynlegt við vinnu þína

Hjálpartæki geta verið tæknileg á borð við:

• gönguhjálpartæki
• hjólastóla
• sérútbúin rúm
• minni hjálpartæki fyrir í eldhús eða baðherbergi

Einng geta þetta verið hjálpartæki sem einstaklingur ber á sér, svo sem:

• stuðningsvesti
• gervihandleggir eða -fætur
• gervibrjóst
• hárkolla (ef um varanlegan hármissi er að ræða)
• stómahjálpartæki
• bæklunarskór eða innlegg
• heyrnartæki
• sérstakur fatnaður
• sjónhjálpartæki

Þegar sum hjálpartæki eru veitt, til dæmis bæklunarskór, þarf að greiða fyrir þau.

Þú þarft að sækja um hjá sveitarfélaginu áður en þú kaupir hjálpartækið. Sveitarfélaggið getur veitt styrk fyrir því hjálpartæki sem best á við og er ódýrast. Óski maður eftir dýrara hjálpartæki þarf viðkomandi að greiða aukakostnað.

Það kostar ekki neitt að fá lánuð hjálpartæki hjá sveitarfélaginu og fjárhagur þinn hefur ekki áhrif á það hvort þú getir fengið styrk eða hve mikið þú getur fengið. Styrkurinn er skattfrjáls.

Almennt þarftu að sækja um rafrænt hjá sveitarfélaginu. Ef þú getur ekki notað rafræna sjálfsafgreiðslu skaltu hafa samband við sveitarfélagið. Þar færðu aðstoð eða leiðbeiningar um önnur úrræði.

Nánari upplýsingar veitir sveitarfélagið. Sjá tengil neðst á síðunni.

Ef þú ert með fötlun sem gerir þér erfitt um vik að vinna, stunda nám eða taka þátt í aðlögunarúrræði kanntu að eiga rétt á hjálpartækjum. Styrkurinn getur falist í láni á tækjum eða fjárhagsaðstoð.

Hjálpartæki geta verið:

• vinnutæki (til dæmis sérútbúinn sími eða stóll)
• minniháttar aðstaða á vinnustað (til dæmis en rampur)
• fræðsluefni (til dæmis hjálparefni fyrir tölvubúnað fyrir lesblinda)

Skilyrðin eru m.a. að:

• hjálpartækið sé alla jafna ekki að finna á vinnustaðnum eða menntastofnuninni
• kostnaðurinn sé meiri en sá sem vinnuveitandanum ber að standa straum af
• hjálpartækið hafi úrslitaþýðingu um hvort þú getir tekið þátt í úrræðinu, haldið starfi þínu eða unnið sjálf/sjálfur/sjálft
• hjálpartækið vegi upp fötlun þína í starfi

Nánari upplýsingar veitir sveitarfélagið þitt. Sveitarfélagið sker úr um hvort þú eigir rétt á hjálpartækjum vegna vinnu, náms eða aðlögunarúrræða. Sjá tengil neðst á síðunni.

Ef þú ert ellilífeyrisþegi eða fórst á örorkulífeyri fyrir árið 2003 geturðu sótt um heilsufarsbætur til sveitarfélagsins. Hefðbundnar heilsufarsbætur ná yfir lyfseðilsskyld lyf, tannlæknakostnað, heyrnartæki, sjúkraþjálfun, fótameðferð, sálfræðiaðstoð og meðferð hjá hnykkjara. Auknar heilsufarsbætur ná yfir gervitennur, gleraugu og/eða fótalæknismeðferð. Upphæð bótanna ræðst af fjárhag þínum.

Nánari upplýsingar veitir sveitarfélagið. Sjá tengil neðst á síðunni.

Ef maður hefur fengið hjálpartækjastyrk í öðru norrænu landi og flytur til Danmerkur þarf oft að sækja um styrk í Danmörku í stað landsins sem flutt er frá.

Þú þarft því að hafa samband við stofnunina sem veitir þér hjálpartæki í landinu sem þú flytur frá og við það sveitarfélag í Danmörku sem þú hyggst flytja til. Þetta þarf að gera áður en flutt er.

Hvert er hægt að snúa sér með spurningar?

Ef frekari spurningar vakna má leita til sveitarfélagsins.