Stuðningur við Úkraínu einkenndi fyrsta fund Norðurlandaráðs á árinu
Norðurlandaráð fundaði dagana 23. og 24. febrúar í Hróarskeldu. Á myndinni er dómkirkjan í Hróarskeldu, sem ráðið heimsótti í tengslum við fundinn.
Á kvöldverði með ráðinu greindi varasendiherrann frá stöðunni í hinu stríðshrjáða landi og þakkaði fyrir áframhaldandi stuðning Norðurlanda.
„12 ár af stríði og fjögur ár af allsherjarinnrásarstríði hafa gefið okkur mótstöðuafl sem enginn bandamaður býr yfir. Það sem við lærum mun gagnast Evrópu. Og við erum tilbúin til að miðla af reynslu okkar, því þetta er ekki einungis stríð Úkraínu.“
Formaður landsdeildar Danmerkur í Norðurlandaráði, Lars-Christian Brask, staðfesti áframhaldandi stuðning Norðurlanda:
„Norðurlandaráð ítrekar einarða fordæmingu sína á allsherjarinnrás Rússlands í Úkraínu. Við hvikum ekki frá stuðningi okkar við friðhelgi yfirráðasvæðis og fullveldi Úkraínu og rétt þjóðarinnar til að taka ákvarðanir um eigin framtíð. Norðurlandaráð hefur í nærri 75 ár staðið vörð um lýðræði, þjóðarétt, mannréttindi og frið. Við lýsum yfir eindregnum stuðningi við viðleitni til að tryggja réttlátan og varanlegan frið í Úkraínu.“
Hér má lesa yfirlýsingu forsætisnefndar Norðurlandaráðs í tilefni af því að fjögur ár voru liðin frá allsherjarinnrásinni: Fjögur ár frá innrásinni – Norðurlönd halda áfram stuðningi við Úkraínu.
Öryggi, loftslag og velferð á dagskrá
Febrúarfundurinn markar einnig upphaf hins pólitíska starfsárs. Í forsætisnefnd og nefndunum fjórum var rætt um ýmis mál sem hafa þýðingu fyrir samstarf norrænu þingmannanna.
- Öryggis- og viðbúnaðarmál voru á dagskrá hjá forsætisnefnd, en mikil áhersla er lögð á þau í formennskuáætlun Finnlands og Álandseyja. Forsætisnefndin ræddi einnig skýrslu um endurskoðun Helsingforssamningsins ásamt höfundi skýrslunnar. Einnig var rætt um alþjóðamál, meðal annars stöðuna í Grænlandi og áframhaldandi stuðning við Úkraínu.
- Norræna sjálfbærninefndin beindi sjónum að því hvernig færa megi byggingariðnaðinn – einn af þeim geirum sem hefur hvað mest áhrif á loftslagið – í átt að aukinni sjálfbærni. Nefndin ræddi auk þess hvernig veita megi norrænum veitendum aukna vernd gagnvart grænþvotti, meðal annars í tengslum við kynningu frá Svansmerkinu.
- Norræna velferðarnefndin fjallaði um tillögu um aukið norrænt samstarf um ofbeldi í nánum samböndum. Málefnið verður einnig á dagskrá á fundi kvennanefndar Sameinuðu þjóðanna í mars, CSW70, sem Norðurlandaráð mun sækja.
- Norræna hagvaxtar- og þróunarnefndin var heimsótt af KPMG, sem kynnti skýrslu um lífeyrismál sem lögð verður fram á þemaþinginu í apríl. Nefndin ræddi auk þess norræna tvísköttunarsamningin og tillögu um bankamillifærslur og greiðslulausnir milli landanna.
- Norræna þekkingar- og menningarnefndin var heimsótt af menningarmálaráðherra Danmerkur, Jakob Engel-Schmidt, sem ræddi norrænt samstarf í menningarmálum, og Gunn Hernes, sem gerði grein fyrir fjárhagsstöðu Norðurlandahússins í Færeyjum. Nefndin lagði einnig fram nýja tillögu um að efla og formfesta samstarf um útivist með sérstakri áherslu á börn og ungmenni.
Tillögurnar sem afgreiddar voru í Hróarskeldu fara nú til frekari afgreiðslu á þemaþingi Norðurlandaráðs í Ósló 16.–17. apríl eða á þinginu í Helsinki í viku 44.