Håkon Øvreås og Øyvind Torseter

Håkon Øvreås
Ljósmyndari
Mona Vetrhus
Håkon Øvreås og Øyvind Torseter (myndir): Brune. Gyldendal 2013

Brune er hlý og sterk saga af vináttu og hugrekki, og um missi, full af hugvitssemi og töfrum hversdagslífsins. Þetta er skemmtileg frásögn af því hvernig er að vera framtakssamur lítill strákur þegar stríðnispúkarnir sem ofsækja mann gefast ekki upp. Jafnframt fléttar höfundinn inn yfirnáttúrulegum þáttum á snjallan og eðlilegan hátt. 

Á daginn er Rune Rune en á nóttunni klæðir hann sig í brún föt og verður ofurhetjan Brune. Stóru strákarnir hafa rifið kofann sem hann smíðaði með vini sínum Atle. Rune ræður ekki við strákana en Brune er ráðagóður og notar brúna málningu og pensil til að ná fram hefndum.

Á steini situr afi og nýtur sumarnæturinnar þrátt fyrir að eiginlega sé hann nýdáinn. Afi og Rune eiga eftir að hittast oftar á ofurhetjustundunum. Afi fær að lokum bæði legstein og kistu en kýs heldur að fara sínar eigin leiðir. Traustinu sem ríkir milli Rune og afa hans er fallega lýst án óþarfrar viðkvæmni. Samtölin eru trúverðug, setningarnar einfaldar en lýsa oft meiru en orðin sem standa. Rune notar næturfundina til þess að kveðja. Og það sem afi segir við hann fer ekki lengra.

Rune fær í sögunni aðstoð frá öðrum ofurhetjum, vinirnir Svartle og Blåse hjálpa líka til. Samheldni barnanna er sterk, þau eru hugvitssöm og í sameiningu geta þau tekist á við stóru strákana og þau þurfa ekki að blanda foreldrunum í málið. Samtölin eru skemmtileg.

Nomineret til Nordisk Råds børne- og ungdomslitteraturpris 2014

Myndskreytingarnar undirstrika lágstemmdan húmorinn í textanum. Línurnar eru einfaldar en svipbrigðin segja þeim mun meira.  Umhverfi og hlutum er lýst með með næmri tilfinningu fyrir smáatriðum, hvort sem um er að ræða húsgagn, kött, límtúbu eða frábæra hugmynd. Farið er sparlega með litina en þeir eru notaðir á áhrifaríkan hátt. Mildir tónarnir bæta við og undirbyggja stemmninguna í bókinni.

Håkon Øvreås (f.1974) hefur áður gefið út tvö ljóðasöfn en þessi bók er frumraun hans sem barnabókahöfundar.

Øyvind Torseter (fæddur 1972) er menntaður í myndskreytingum frá Kent Institute of Art and Design í Englandi. Hann hefur unnið ýmis verðlaun og árið 2008 hlaut hann Bologna Ragazzi Award fyrir myndabókina Avstikkere (Krókaleiðir).   

Brune var tilnefnd til Brage-verðlaunanna 2013 og hlaut Bókmenntaverðlaun norska menningarmálaráðuneytisins fyrir bókaárið 2013.