Bankareikningur í Finnlandi

Finnskir bankar bjóða viðskiptavinum sínum afar fjölbreytta þjónustu. Hér er aðeins fjallað um helstu hliðar bankaþjónustu í daglegu lífi. Þú getur fengið nánari upplýsingar um annars konar bankaþjónustu hjá bankanum þínum.

Finnska fjármálaeftirlitið hefur eftirlit með starfsemi banka í Finnlandi. Komi upp vandamál í tengslum við bankaþjónustu geta viðskiptavinir bankanna leitað ráða hjá trygginga- og fjármögnunarráðgjöfinni FINE.

Bönkunum ber skylda til að veita öllum þeim viðskiptavinum sem búa löglega í Finnlandi alla helstu grunnþjónustu, án mismununar og með jafnræði að leiðarljósi. Með grunnþjónustu banka er átt við almennan bankareikning og það sem þarf til að nota hann, svo sem debetkort og aðgang að netbanka, og möguleika til að taka út reiðufé, framkvæma greiðslur og auðkenna sig rafrænt. Kreditkortareikningar og kreditkort eru dæmi um þjónustu sem fellur ekki undir grunnþjónustu banka. Nánari upplýsingar um grunnþjónustu banka í Finnlandi eru á heimasíðu finnska fjármálaeftirlitsins.

Til að banki geti opnað fyrir þig almennan reikning og stofnað nauðsynlegar þjónustuleiðir fyrir þig þarf bankinn að geta staðfest deili á þér. Best er að framvísa gildu vegabréfi eða nafnskírteini sem gefið er út af yfirvöldum. Til að opna bankareikning þarft þú að mæta í bankaútibú í eigin persónu með skilríkin meðferðis.

Hér fyrir neðan er listi yfir finnska banka sem þjónusta viðskiptavini og veita aðgang að netbanka.

Í Finnlandi gegnir aðgangur að netbanka hlutverki rafræns auðkennis og auðkenning gegnum netbankann samsvarar þannig undirskrift þinni. Auk innritunar í þinn netbanka geturðu þannig notað bankaauðkennið til innritunar á aðra þjónustuvefi, svo sem vef finnsku almannatryggingastofnunarinnar (Kela) og vef skattayfirvalda, og til þess að staðfesta kaup á netinu. Netbankaauðkenni þitt er aðeins ætlað þér og ekki er leyfilegt að veita öðrum afnot af því. Nánari upplýsingar eru á síðunni Rafræn auðkenning í Finnlandi.

Til að fá netbankaauðkenni þarft þú að gera samning við bankann þinn. Nánari upplýsingar færðu hjá þínum viðskiptabanka. Til að fá netbankaauðkenni þarft þú að mæta í útibú bankans þíns í eigin persónu. Einnig þarftu að framvísa persónuskilríkjum þínum í bankanum.

Bankinn getur neitað þér um netbankaauðkenni ef þú hefur ekki finnska kennitölu eða ef þú ert ekki skráð(ur) í þjóðskrá Finnlands. Í slíkum tilfellum á bankinn að bjóða þér aðra og takmarkaðri rafræna auðkenningaraðferð sem nýtist til auðkenningar fyrir debetreikning og þjónustu tengda honum.

Millifærslur í evrum er hægt að framkvæma á sama hátt og á sama verði til Finnlands og til annarra SEPA-landa. SEPA-löndin (e. „Single Euro Payments Area“) eru, auk evrulandanna, önnur lönd innan ESB og EES, Sviss og Bretland. Sláðu reikningsnúmer móttakanda greiðslunnar inn á IBAN-formi, svo að bankinn viti að um SEPA-greiðslu sé að ræða.

Eigir þú von á greiðslu frá öðru landi skaltu gæta þess að gefa reikningsupplýsingar þínar upp á réttu formi. Í SEPA-greiðslum þarf reikningsnúmer móttakanda að vera á IBAN-formi og einnig þarf BIC-númer viðskiptabanka móttakandans að koma fram. Þú getur skoðað IBAN-númerið þitt á reikningsyfirliti, í netbankanum eða fengið upplýsingar um það hjá bankanum þínum.

Nánari upplýsingar færðu hjá þínum viðskiptabanka.

Finnskir bankar veita almennt ekki húsnæðislán til kaupa á húsnæði í öðru norrænu landi. Hyggist þú taka húsnæðislán hjá finnskum banka til kaupa á húsnæði í öðru norrænu landi skaltu hafa samband við bankann þinn til að ganga úr skugga um hvort nota megi húsnæðislán þaðan til að kaupa húsnæði í öðru norrænu landi.

Hyggist þú kaupa húsnæði í Finnlandi með húsnæðisláni frá erlendum banka er ekki víst að bankinn þinn samþykki að veita slíkt lán vegna kaupa á húsnæði í Finnlandi. Athugaðu málið hjá þínum banka.

Nánari upplýsingar um húsnæðislán í Finnlandi eru á vefsvæði finnsku samkeppnis- og neytendastofnunarinnar.