Rafræn auðkenning í Finnlandi

Skilyrði fyrir því að fá finnskan netbankaaðgang eru mismunandi eftir bönkum. Skilyrði fyrir útgáfu netbankaauðkenna eru þrengri en skilyrðin fyrir því að opna bankareikning því að bankanum ber lagaleg skylda til að ganga úr skugga um að viðskiptavinir séu þeir sem þeir segjast vera. Nánari upplýsingar eru á vefsvæði FINE.

Nánari upplýsingar um þjónustu banka í Finnlandi eru á síðunni Bankareikningur í Finnlandi.

Borgaraauðkenni er innifalið í nafnskírteinum sem gefin eru út af finnsku lögreglunni. Þú getur fengið finnskt nafnskírteini ef þú ert finnskur ríkisborgari eða erlendur ríkisborgari með fasta búsetu í Finnlandi samkvæmt finnskum lögum um búsetusveitarfélög, ert skráð/ur í finnsku þjóðskrána og hefur staðfest deili á þér með áreiðanlegum hætti. Upplýsingar um að panta nafnskírteini eru á vefsvæði finnsku lögreglunnar.

Borgaraauðkennið er í örflögu í nafnskírteininu. Með borgaraauðkenninu getur þú auðkennt þig á rafrænum þjónustusíðum hins opinbera og undirritað skjöl rafrænt. 

Til að taka borgaraauðkenni í notkun sem rafrænt auðkenni þarf að virkja örflöguna í nafnskírteininu. Til að virkja örflöguna þarft þú virkjunarnúmer sem fylgir skírteininu, örflögulesara og forrit sem getur lesið nafnskírteini. Þú getur einnig virkjað nafnskírteinið í síma með því að nota smáforritið hightrust.id. Leiðbeiningar um það að virkja nafnskírteini eru á vefsvæði finnsku stofnunarinnar um stafræna væðingu og lýðfræðigögn (DVV). 

Nánari upplýsingar um borgaraauðkenni og eIDAS-reglugerðina eru á vefsvæði finnsku stofnunarinnar um stafræna væðingu og lýðfræðigögn (DVV).

Sum finnsk farsímafyrirtæki bjóða viðskiptavinum sínum möguleika á auðkenningu gegnum farsímann. Farsímaauðkenning er möguleg með öllum gerðum farsíma en til að sterk auðkenning sé möguleg þarf sérstakt farsímaauðkenni sem virkjað er í SIM-korti farsímans og notað sem rafrænt auðkenni.

Til þess að fá farsímaauðkenni þarft þú að hafa farsímaáskrift hjá aðila sem býður upp á slíka þjónustu, auk finnsks netbankaaðgangs og SIM-korts sem styður farsímaauðkenni.

Ef þú vilt virkja farsímaauðkenningu í finnska SIM-kortinu þínu skaltu hafa samband við farsímafyrirtækið. Þú færð nánari upplýsingar hjá farsímafyrirtækinu þínu. Kynntu þér málið betur á síðunum Suomi.fi og Mobiilivarmenne.fi.

Samkvæmt eIDAS-reglugerðinni verða allir þjónustuveitendur opinberra rafrænna þjónustuleiða í löndum ESB að samþykkja rafrænar auðkenningarleiðir allra hinna landanna innan ESB. Það þýðir að þú getur auðkennt þig rafrænt á þjónustusíðum hins opinbera í Finnlandi ef þú hefur virka rafræna auðkenningarleið sem er viðurkennd í öðru ESB-landi.

Á síðunni Suomi.fi finnur þú lista yfir lönd hverra auðkenningarleiðir er hægt að nota í Finnlandi. Nánari upplýsingar um auðkenningarleiðir eIDAS eru á vefsvæði finnsku stofnunarinnar um stafræna væðingu og lýðfræðigögn.

Finnish Authenticator er auðkenningarþjónusta fyrir borgara annarra landa í Finnlandi. Hún gerir þér kleift að auðkenna þig á þjónustusíðum hins opinbera í Finnlandi. Þjónustan er á ensku. Finnish Authenticator er smáforrit sem hægt er að sækja í snjallsíma. Smáforritið er aðeins hægt að nota til auðkenningar á þjónustusíðum sem hafa samþykkt það sem auðkenningarleið.

Þjónustan er ætluð fólki sem hefur ekki finnska kennitölu og hefur náð 18 ára aldri. Með hjálp þjónustunnar má sinna erindum á finnskum þjónustusíðum sem krefjast auðkenningar. Einnig má nýta þjónustuna til að sinna erindum fyrir hönd félagasamtaka og fyrirtækja.

Ef þú þarft stuðning til þess að taka í notkun eða nota Finnish Authenticator skaltu hafa samband við finnsku stofnunina um stafræna væðingu og lýðfræðigögn (Digi- ja väestötietovirasto).

Nánari upplýsingar um þjónustuleiðina Finnish Authenticator eru á vefsvæði finnsku stofnunarinnar um stafræna væðingu og lýðfræðigögn.