Fjárhagsaðstoð í Danmörku

Þú sækir um fjárhagsaðstoð hjá sveitarfélaginu. Sveitarfélagið metur hvort þú eigir rétt á aðstoð og hvaða fjárhæð þú getur eftir atvikum fengið. Það fer meðal annars eftir aldri þínum, menntun, hve lengi þú hefur dvalið í Danmörku og hvort þú hefur áður verið í vinnu.

Hvaða almennu skilyrði þarftu að uppfylla til að fá fjárhagsaðstoð?

Til að eiga rétt á aðstoð þarftu að uppfylla eftirfarandi skilyrði:

• Það hafa orðið breytingar á höfum þínum, svo sem vegna veikinda, atvinnuleysis eða skilnaðar.
• Þessar breytingar hafa haft það í för með sér að þú getur ekki séð fyrir þér eða fjölskyldu þinni og að enginn annar sér fyrir þér.
• Aðrar greiðslur, svo sem atvinnuleysisbætur eða lífeyrisgreiðslur, nægja ekki til að sjá fyrir þér.

Sveitarfélagið lítur til eigna þinna og tekna þegar það metur hvort þú getir fengið fjárhagsaðstoð. Þú mátt vinna á meðan þú færð fjárhagsaðstoð, en launatekjur þínar geta þýtt að þú fáir minna greitt. Reglurnar fara eftir því hvaða fjárhæð þú færð.

Hvaða fjárhagsaðstoð er í boði?

Fjárhæðin sem þú getur fengið fer meðal annars eftir aldri þínum, hve lengi þú hefur búið löglega í Danmörku, Grænlandi eða Færeyjum og hvort þú hefur áður verið í vinnu. Um ferns konar aðstoð er að ræða: aukin aðstoð, grunnaðstoð, lágmarksaðstoð og aðstoð fyrir þau sem búa hjá foreldrum.

• Til að eiga rétt á aukinni aðstoð eða grunnaðstoð þarf viðkomandi alla jafna að hafa búið með löglegum hætti í Danmörku, Færeyjum eða Grænlandi í 9 af síðustu 10 árum. Ef þú ert aðflutt/ur þarftu alla jafna einnig að uppfylla kröfu um að hafa verið í fullri vinnu í 2 ár og 6 mánuði á síðustu 10 árum. Skilyrðin um dvöl og atvinnu gilda ekki ef þú átt rétt á aðstoðinni samkvæmt rétti ESB. Það getur til dæmis átt við um ríkisborgara ESB-/EES-landa sem hafa stöðu launafólks í Danmörku og fjölskyldumeðlimi þeirra.
• Þú getur einnig fengið aukna aðstoð ef þú ert orðin/n 25 ára og uppfyllir skilyrði um vinnu. Það þýðir að jafnaði að þú þurfir að hafa verið í almennu fullu starfi í Danmörku, Grænlandi, Færeyjum eða öðru ESB-/EES-landi í að minnsta kosti 2 ár og 6 mánuði á síðustu 10 árum.
• Ef þú ert yngri en 30 ára og uppfyllir skilyrðin geturðu fengið grunnaðstoð.
• Ef þú ert yngri en 30 ára og býrð hjá öðru eða báðum foreldrum þínum færðu aðstoð fyrir þau sem búa hjá foreldrum.

Á borger.dk má lesa um hvaða áhrif eignir þínar kunna að hafa á rétt þinn til fjárhagsaðstoðar. Einnig má lesa þar um viðbótargreiðslur, útreikning á dvalartíma, kröfur um atvinnuþátttöku og fleira.

Þú getur sótt um fjárhagsaðstoð með sjálfsafgreiðslu á borger.dk. Þú getur einnig haft samband við sveitarfélagið þitt ef þú þarft aðstoð við að sækja um. Á borger.dk getur þú lesið nánar um skilyrði, fjárhæðir og umsókn.

Hvað þýðir að vera tilbúin/n til starfa eða tilbúin/n til virkniúrræða?

Eigi síðar en viku eftir að þú hefur fyrst haft samband við sveitarfélagið vegna aðstoðar verður þú boðuð/boðaður í viðtal. Sveitarfélagið metur hvort þú sért tilbúin/n til starfa eða tilbúin/n til virkniúrræða.

Ef sveitarfélagið metur að þú getir farið í vinnu innan skamms telst þú vera tilbúin/n til starfa. Það þýðir að þú þarft að jafnaði að leita að vinnu og geta tekið við starfi.

Ef sveitarfélagið metur að þú getir ekki farið í vinnu með stuttum fyrirvara telst þú vera tilbúin/n til virkniúrræða. Það þýðir að þú þarft að taka þátt í þeim úrræðum sem sveitarfélagið ákveður í samráði við þig.

Ef þú færð lágmarksfjárhæð og uppfyllir ekki skilyrðin um dvöl og atvinnu getur þú fallið undir vinnuskyldu. Það þýðir að sveitarfélagið getur gert kröfu um að þú takir þátt í virkni í allt að 37 klukkustundir á viku. Það getur til dæmis verið samfélagslegt starf, starfsþjálfun hjá fyrirtæki eða almennar launaðar vinnustundir.

Ef þú ert ekki danskur ríkisborgari og færð fjárhagsaðstoð í lengri tíma getur það haft áhrif á rétt þinn til dvalar í Danmörku. Sveitarfélagið getur tilkynnt málið til Útlendingastofnunar Danmerkur, sem metur hvort þú hafir áfram rétt til að dvelja í Danmörku.

Ef þú ert norrænn ríkisborgari og fellur undir Norðurlandasamninginn um félagslega aðstoð og félagslega þjónustu geta gilt sérstakar reglur um vernd gegn heimsendingu. Að jafnaði er ekki hægt að senda þig heim vegna þarfar fyrir félagslega aðstoð ef fjölskylduaðstæður þínar, tengsl þín við Danmörku eða aðrar aðstæður mæla með því að þú eigir að fá að vera áfram. Ekki er hægt að senda þig heim af þessari ástæðu ef þú hefur búið löglega í Danmörku í meira en þrjú ár.

Reglurnar má sjá í tilkynningu um lög um félagsmál.

Ef spurningar vakna er hægt að hafa samband við viðkomandi sveitarfélag.