Fjárhagsstuðningur vegna hjálpartækja á Íslandi

Ef þú býrð á Íslandi, ert ríkisborgari í öðru norrænu landi og þarft á hjálpartækjum að halda átt þú sama rétt til að sækja um opinberan stuðning og aðrir sjúkratryggðir á Íslandi.

Ef þú ert sjúkratryggður á Íslandi er hægt að sækja um stuðning til Sjúkratrygginga Íslands bæði vegna þeirra hjálpartækja sem einstaklingur þarfnast fyrir daglegt líf sitt og fyrir umönnun og meðferð.

Umsókn er send rafrænt í gegnum Gagnagátt eða Sögu sjúkraskrá af heilbrigðisstarfsmanni, hún þarf að innihalda:

• Rökstuðning fyrir þörf á hjálpartæki út frá færni, fötlun og heilsu

• Upplýsingar úr sjúkraskrá um sjúkdómsgreiningar (ICD númer) og sjúkrasögu þegar um fyrstu umsókn er að ræða

• Þegar um er að ræða fyrstu umsókn er umsögn og/eða færnimat heilbrigðisstarfsmanns nauðsynleg. Ef breyting verður á sjúkdómsástandi/fötlun getur þurft nýja umsögn hlutaðeigandi heilbrigðisstarfsmanns.

Hjálpartæki í bifreiðar

Sjúkratryggingar Íslnds greiða eða taka þátt í kaupum á nauðsynlegum hjálpartækjum eftir ákveðnum reglum.

Það er ýmiss búnaður í bifreiðar sem nauðsynlegur er vegna fötlunar ökumanns. T.d. styrkur vegna sjálfskiptingar, sérstakra breytinga á hemlabúnaði og bensíngjöf og bílalyftu fyrir hjólastólanotendur.

Hjálpartæki til notkunar í skólum

Sjúkratryggingum Íslands er heimilt að veita styrki vegna tveggja hjálpartækja af sömu gerð til mikið faltaðra barna og unglinga sem vegna skólagöngu (leikskóla og grunnskóla) eða dvalar á þjólfunar- og dagvistunarstofnunum yrðu ella að vera án hjálpartækja sinna daglangt.

Hjálpartæki til tjáskipta

Sjúkratryggingar Íslands greiða hjálpartæki til tjáskipta vegna mikilla örðugleika við munnlega og/eða skrifleg tjáskipti eftir ákveðnum reglum.

Það eru til ýmiss konar lausnir til að auðvelda tjáskipti, þar má nefna einfaldar lausnir svo sem skriffæri, samskiptabækur og myndaspjöld.

Hjálpartæki til notkunar á sambýlum

Þeir sem búa á sambýli og eru sjúkratryggðir eiga sama rétt og þeir sem búa á einkaheimilum til einstaklingsbundinna hjálpartækja, svo sem göngutækis, sérútbúins rúms, borðáhalda og hjálpartækja til að klæðast.

Hjálpartæki á heilbrigðisstofnunum, dvalar- og vistheimilum

Sjúkratryggingar Íslands greiða ekki styrki vegna hjálpartækja til þeirra sem vistast á sjúkrastofnunum.  Hið sama gildir um öldrunarstofnanir, vistheimili, heimili fyrir börn og aðrar sambærilegar stofnanir.  Í þeim tilvikum skal viðkomandi sjúkrahús eða stofnun sjá vistmönnum fyrir öllum hjálpartækjum.

Ef þú vilt fá nánari upplýsingar varðandi hjálpartæki þá er hægt að hafa samband við þjónustuver Sjúkratrygginga Íslands í síma 515-0000. Einnig er að finna mikið magn upplýsinga á heimasíðu Sjúkratrygginga Íslands.