Grunnskólar í Noregi

children in classroom
Ljósmyndari
Yadid Levy / Norden.org
Hér má lesa um grunnskólakerfið í Noregi.

Í Noregi er grunnskólanám skylda. Ef þú hyggst dvelja í Noregi með barn á grunnskólaaldri lengur en í þrjá mánuði þarftu að skrá barnið í skóla hjá sveitarfélaginu þar sem þið ætlið að búa. Foreldrar þurfa sjálfir að skrá börn sín í skóla.

Allir opinberir grunnskólar í Noregi eru gjaldfrjálsir en fjármagnaðir af sveitarfélögunum. Einnig starfa nokkrir einkareknir grunnskólar. Fáðu nánari upplýsingar um skólana hjá sveitarfélaginu þar sem þú býrð eða ert að flytja til. Valkostur við grunnskóla er einkakennsla á heimilinu.

Grunnskólinn er tíu ár og börn hefja yfirleitt skólagöngu árið sem þau verða sex ára. Grunnskólanum er skipt í tvö stig. Fyrstu sjö árin (1.–7. bekkur) eru kölluð barnastig og þau þrjú næstu (8.–10. bekkur) unglingastig. Skólanum ber að sjá nemendum fyrir öllum nauðsynlegum námsgögnum og útbúnaði. Nemendur þurfa að hafa með sér nesti í skólann. 

    Sérkennsla

    Nemendur sem ná ekki tilskildum árangri með almennri kennslu eiga rétt á sérkennslu. Skólarnir/skólaeigendur ákveða hvort nemendur eiga rétt á sérkennslu. Ef nemandi eða foreldrar hans eru ekki sáttir með úrskurðinn geta þeir kvartað til sýslumanns.

    Önnur tungumálakennsla

    Allir nemendur með annað móðurmál en norsku og samísku eiga rétt á aukakennslu í norsku þar til nemandinn er orðinn það góður í norsku að hann getur fylgst með hefðbundinni kennslu. Ef þörf krefur eiga nemendurnir einnig rétt á móðurmálskennslu og/eða kennslu á tveimur tungumálum.

    Ef þrír grunnskólanemar eða fleiri í Troms og í Finnmörku fara fram á að fá kennslu á finnsku eiga þeir rétt á því. Á samískum svæðum eiga allir nemendur á grunnskólaaldri rétt á kennslu í og á samísku.  Í öðrum sveitarfélögum gildir sú regla að ef tíu nemendur eða fleiri óska eftir kennslu í og á samísku eiga þeir rétt á henni að því tilskildu að eigi færri en sex nemendur verða eftir í hópnum.

    Aðstoð við heimanám og skóladagheimili

    Allir grunnskólanemar eiga rétt á ókeypis aðstoð við heimanám. Sveitarfélaginu er skylt að bjóða hana. Sveitarfélögum er einnig skylt að bjóða skólanemum í 1.-4. bekk pláss á skóladagheimili (SFO) fyrir og eftir skóla. Sama á við um börn með sérþarfir í 1.-7. bekk. Skóladagheimilin eru einnig valfrjáls. Nánari upplýsingar um þessa þjónustu veitir sveitarfélagið eða skólarnir sjálfir.

    Leiðin í skólann og skólaakstur

    Ef leiðin í skólann þykir löng eða hættuleg eða ef nemandi er fatlaður eða slasaður á hann rétt á ókeypis skólaakstri.

    Frí og frídagar

      Eigandi skólans ákveður hvenær frí og frídagar eru í skólanum. Allir norskir helgidagar eru frídagar. Sveitarfélaginu er heimilt að gefa nemendum frí úr skóla í allt að tvær vikur ef það þykir verjandi.

      Grunnskóli á Svalbarða

        Kennslulögin gilda ekki á Svalbarða. Umsjón með kennslu á eyjaklasanum er í höndum yfirvalda í Longyearbyen.

        Samband við yfirvöld
        Spurning til Info Norden

        Ef þú ert með spurningu skaltu fylla út eyðublaðið hérna:

        ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

        Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
        Leitaðu að skrifstofu Info Norden hérna