Leiðbeiningar: fjarvinna í Noregi eða fyrir norskan vinnuveitanda
Hvað er fjarvinna?
Fjarvinna þýðir að þú vinnur annars staðar en á fastri skrifstofu vinnuveitandans – oft heima hjá þér. Ef þú býrð í Noregi og vinnur hjá erlendum vinnuveitanda eða býrð erlendis og vinnur hjá norskum vinnuveitanda gilda sérstakar reglur um skatta, tryggingar og vinnurétt. Reglurnar geta verið flóknar og því er mikilvægt að þú kannir hvað á við um þig.
Skriflegur samningur um fjarvinnu
Það getur komið sér vel að gera skriflegan samning við vinnuveitandann sem lýsir því vinnan mun ganga fyrir sig. Samningurinn ætti að innihalda upplýsingar á borð við:
- vinnutíma
- skatta
- almannatryggingakerfi hvaða lands þú tilheyrir
- meðhöndlun veikindaleyfis og annarrar fjarveru
- gagnaöryggi og þann búnað sem þú þarft
- skipting mögulegra aukalegra útgjalda vegna fjarvinnu
Skattar við fjarvinnu
Meginreglan er að greiða þarf skatt í því landi sem unnið er í. Það þýðir að ef þú býrð og starfar í Noregi fyrir erlendan vinnuveitanda þarftu alla jafna að greiða skatt í Noregi.
Ef þú starfar í tveimur löndum kunna aðrar reglur að gilda. Noregur hefur gert tvísköttunarsamninga við mörg lönd, þar á meðal þau norrænu, til að koma í veg fyrir tvísköttun. Þrátt fyrir það ættir þú alltaf að hafa samband við skattyfirvöld í bæði Noregi og hinu landinu til að fá á hreint hvar þú átt að greiða skatt.
Nánari upplýsingar er að finna á Norrænu skattagáttinni, sameiginlegu vefsvæði hinna norrænu skattyfirvalda.
Almannatryggingar, vinnuslys og réttur til heilbrigðisþjónustu
Ef þú vinnur í öðru landi en þar sem vinnuveitandinn hefur starfsemi getur það haft áhrif á rétt þinn til ýmissa opinberra bóta, almannatrygginga, og heilbrigðisþjónustu. Hér er gefið yfirlit yfir það sem gott er að hafa í huga við fjarvinnu milli landa.
Það hvaða almannatryggingakerfi þú tilheyrir segir fyrir um hvaða bótum þú átt rétt á, svo sem rétti til lífeyris, atvinnuleysisbótum, sjúkradagpeningum og fæðingarorlofi. Yfirleitt tilheyrir þú almannatryggingarkerfi þess lands sem þú ert staðsettur í við vinnu. Ef þú býrð og starfar í Noregi tilheyrir þú yfirleitt norska almannatryggingakerfinu jafnvel þótt vinnuveitandi þinn sé í öðru landi. Ef þú starfar bæði í Noregi og öðru EES-landi gilda aðrar reglur. Vinnumála- og velferðarstofnunin, NAV, getur metið hvar þú átt rétt á almannatryggingum. Þú getur einnig sótt um A1-eyðublað sem sýnir í hvaða landi þú ert tryggð(ur).
Norskum vinnuveitendum er skylt að hafa vinnuslysatryggingu fyrir starfsmenn sína, en það á yfirleitt aðeins við ef vinnan fer fram í Noregi. Ef þú vinnur frá öðru landi þarf vinnuveitandinn að meta hvort þú þurfir viðbótartryggingu. Þú skalt því ganga úr skugga um að þú hafir tryggingar sem gilda óháð því hvar þú vinnur.
Ef þú tilheyrir norska almannatryggingakerfinu átt þú að meginreglunni til einnig rétt á heilbrigðisþjónustu í Noregi. Nánari upplýsingar er að finna í greininni „Réttur til heilbrigðisþjónustu í Noregi“.
Vinnuumhverfi við fjarvinnu
Vinnuverndarlög gilda einnig við vinnu heiman frá í Noregi. Vinnuveitandinn ber ábyrgð á að tryggja að vinnuaðstæður séu öruggar, þar á meðal á heimaskrifstofu. Ef þú vinnur frá öðru landi gilda vinnuverndarlög þess lands. Þá þarf vinnuveitandinn að fylgja þeim reglum sem gilda þar sem vinnan fer fram.
Hvert skal leita með frekari spurningar?
Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.
ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.