Ríkisborgararéttur í Færeyjum

Færeyskur ríkisborgararéttu er ekki til. Flestir íbúar Færeyja eru danskir ríkisborgarar.

Hægt er að fá danskan ríkisborgararétt með yfirlýsingu til ríkisumboðsmannsins í Færeyjum eða með veitingu ríkisborgararéttar (naturalisation).

Margir þjóðfélagshópar geta fengið danskan ríkisborgararétt með því að skila inn yfirlýsingu til ríkisumboðsmanns.

Tvöfalt ríkisfang

Með tilskipun 761 frá 30. júní 2019 um gildistöku breytinga á lögum um danskan ríkisborgararétt sem tóku gildi þann 3. ágúst 2019 breyttust meðal annars reglurnar um tvöfalt ríkisfang.

Tilskipunin felur í sér að danskir ríkisborgarar sem vilja taka upp annað ríkisfang geta gert það án þess að afsala sér dönsku ríkisfangi. Þeir þurfa ekki að gera neitt gagnvart dönskum yfirvöldum í því sambandi.

Það fer þó eftir löggjöf þess lands þar sem þeir hyggjast taka upp ríkisfang hvort tvöfalt ríkisfang sé heimilt eða þess sé krafist að þeir afsali sér dönsku ríkisfangi. Danskir ríkisborgarar geta áfram, að uppfylltum ákveðnum skilyrðum, óskað eftir því við ráðuneyti útlendinga- og aðlögunarmála að losna undan dönsku ríkisfangi sínu.

Tilskipunin felur jafnframt í sér að erlendir ríkisborgarar sem vilja taka upp danskt ríkisfang eru ekki lengur krafðir um það af hálfu Danmerkur að afsala sér öðru ríkisfangi. Það fer þó eftir löggjöf þess lands þar sem viðkomandi er með ríkisfang hvort tvöfalt ríkisfang sé heimilt eða hvort viðkomandi þurfi að afsala sér ríkisfangi í því landi þegar hann tekur upp danskt ríkisfang.

Tilskipunin felur einnig í sér tvö bráðabirgðaákvæði varðandi það að öðlast danskt ríkisfang með yfirlýsingu. Vísað er til kafla um ríkisfang með yfirlýsingu. Dönsku reglurnar eiga því við.