Síðustu forvöð að senda inn tillögur að tilnefningum til umhverfisverðlauna Norðurlandaráðs 2025
Umhverfisverðlaun Norðurlandaráðs 2025 verða veitt verkefni sem virkjar almenning í grænum umskiptum. Verðlaunaféð nemur 300 þúsundum danskra króna. Þema umhverfisverðlaunanna er mismunandi frá ári til árs og í ár er sjónum beint að framlagi borgarasamfélagsins til grænna umskipta.
Þegar samfélagið stendur saman og vinnur að sameiginlegum markmiðum getum við náð miklum árangri á stuttum tíma. Og tíminn skiptir öllu hvað varðar umhverfis- og náttúruvernd og grænu umskiptin. Við þurfum að ná árangri og það þarf að gerast hratt. Það gerist aðeins með virku og öflugu borgarasamfélagi.
Öllum er frjálst að senda inn tillögur
Veist þú um norrænt fyrirtæki, samtök eða einstakling sem verðskuldar að hljóta umhverfisverðlaun Norðurlandaráðs í ár? Sendu þá inn tillögu í síðasta lagi 30. apríl.
Svona er verðlaunahafinn valinn
Handhafi umhverfisverðlaunanna er valinn í þríþættu ferli:
- Allir geta sent inn tillögur að tilnefningum
- Dómnefndir landanna tilnefna 1–2 kandídata
- Dómnefndin kemur samar og velur sigurvegara
Tilkynnt verður um tilnefningar þann 27. júní í tengslum við Almedalsvikuna í Svíþjóð. Verðlaunahafinn fær afhenta verðlaunastyttu við athöfn á þingi Norðurlandaráðs í Stokkhólmi í október 2025. Verðlaunahafinn hlýtur 300.000 danskar krónur.
Verðlaunin eru 30 ára
Umhverfisverðlaun Norðurlandaráðs eru 30 ára í ár. Þegar verðlaunin voru veitt í fyrsta sinn árið 1995 var það sænski vísindamaðurinn Torleif Ingelög sem hlaut þau fyrir framlag sitt til verndunar líffræðilegrar fjölbreytni í landbúnaði og skógrækt. Síðan þá hafa verðlaunin verið veitt alls 30 sinnum og á meðal verðlaunahafa eru útivistarsamtök, þrír bankar, margs konar sprotafyrirtæki, orkufyrirtæki og fjöldi norrænna vísindamanna. Árið 2019 hlaut Greta Thunberg frá Svíþjóð verðlaunin en í mótmælaskyni við aðgerðaleysi í loftslagsmálum neitaði hún að þiggja þau.
Umhverfisverðlaun Norðurlandaráðsvoru fyrst veitt árið 1995 og markmiðið með þeim er að efla vitund um náttúru- og umhverfisvernd á Norðurlöndum. Norðurlandaráð veitir einnig bókmenntaverðlaun, tónlistarverðlaun, kvikmyndaverðlaun og barna- og unglingabókmenntaverðlaun.
