Stéttarfélög í Finnlandi

Stéttarfélög starfa að málefnum er varða fólk á vinnumarkaði og gæta hagsmuna aðildarfólks síns. 

Í Finnlandi á vinnandi fólk rétt á því að tilheyra stéttarfélagi. Þar má ekki mismuna starfsfólki á grundvelli stéttarfélagsaðildar eða skorts á slíkri aðild. Aðild að stéttarfélagi er valfrjáls í Finnlandi.

Stéttarfélög standa vörð um hagsmuni félagsmanna sinna og eru málsvarar vinnandi fólks, til dæmis í málum sem varða launakjör og starfsskilyrði. Stéttarfélög veita auk þess ýmsa þjónustu fyrir fólk á vinnumarkaði, svo sem á formi ráðgjafar og þjálfunar. Ýmis fríðindi geta líka fylgt aðild að stéttarfélagi, svo sem tryggingar, afslættir og niðurgreiðsla kostnaðar við tómstundir.

Stéttarfélög koma einnig að viðræðum um kjarasamninga, meðal annars. Nánari upplýsingar eru á vefsvæði InfoFinland.

Ef þú átt aðild að stéttarfélagi greiðir þú því iðgjöld. Iðgjöldin geta numið tiltekinni upphæð eða verið ákveðið prósentuhlutfall af tekjum þínum. Dæmigert prósentuhlutfall slíkra iðgjalda er 1-2 prósent af mánaðarlaunum þínum. Iðgjöld til stéttarfélögs geta verið frádráttarbær frá skatti. Nánari upplýsingar eru á vefsvæði InfoFinland.

Langflest stéttarfélög í Finnlandi heyra undir eitt af þremur stórum landssamböndum stéttarfélaga í landinu. Þú finnur þitt stéttarfélag gegnum viðeigandi samband stéttarfélaga.

• Landssamband finnskra stéttarfélaga, SAK. Aðild að SAK eiga 18 aðildarfélög sem gæta hagsmuna starfsfólks í iðnaði, opinbera geiranum, flutningageiranum, menningargeiranum, í íþróttum og hjá fjarskiptafyrirtækjum og einkareknum þjónustufyrirtækjum.
• STTK, Landssamband stéttarfélaga fagfólks og embættismanna í Finnlandi. Aðild að STTK eiga 13 aðildarfélög sem gæta hagsmuna fólks í iðnaðar- og þjónustustörfum í opinbera geiranum og einkageiranum, svo sem embættismanna sveitarfélaga og ríkis og starfsfólks hjá heilbrigðisstofnunum, söfnuðum, í skógiðnaði og starfsfólki viðbragðsaðila og neyðarþjónusta.
• Vinnumarkaðssamband háskólamenntaðra í Finnlandi, Akava. Í Akava eru 36 aðildarfélög sem gæta hagsmuna háskólamenntaðs fólks á vinnumarkaði, svo sem kennara, lækna, hagfræðinga, lögfræðinga, fræðifólks og verkfræðinga.

Nánari upplýsingar er að finna á vefsvæðum sambanda stéttarfélaga í Finnlandi.

Þegar fólk gengur í stéttarfélag í Finnlandi skráir það sig oft í atvinnuleysissjóð í leiðinni. Skráning í atvinnuleysissjóð er þó ekki forsenda fyrir aðild að stéttarfélagi og einnig er hægt að skrá sig í atvinnuleysissjóð án þess að eiga aðild að stéttarfélagi. Nánari upplýsingar um atvinnuleysissjóði eru á síðunni Atvinnuleysisbætur í Finnlandi.