6.bekkur Hofsstaðaskóla hreppti vinninginn í Baráttunni gegn matarsóun á Íslandi
6.bekkur Hofsstaðaskóla
Framtíðarneytendur gera breytingu til batnaðar
Nemendur 6.bekkjar Hofsstaðaskóla urðu himinlifandi þegar fréttin um vinning Baráttunnar gegn matarsóunar barst.
Aðspurð fannst þeim verkefnið vekja til umhugsunar um að minnka matarsóun og þau eru sammála um að matarsóun hefur minnkað hjá þeim í matsal.
Enda er rík ástæða til að takast á við vandann: matarsóun er hnattrænt loftslagsvandamál, sem hefur hlotið aukna athygli undanfarin ár.
Norrænir skólar sýna samstöðu gegn matarsóun
Frumkvæðið náði til yfir 400 norrænna kennara, sem m.a. gátu nýtt sér margvíslegt fræðsluefni á námsgátt Sambands Norrænu félaganna, www.nordeniskolen.org, sem fjallar um hvaðeina frá fornum norrænum korntegundum um skógarfylgsni í Finnlandi að hafdjúpinu sem umlykur Ísland. Helsta verkefnið fólst þó í að vigta matarafganga bekkjarins og sannreyna að fimmti hver nestispakki eða skólamáltíð í norrænum skólum endar í ruslinu.
„Markmiðið með Baráttunni gegn matarsóun var fyrst og fremst að vekja nemendur til umhugsunar um eigið athæfi. Vissulega getur verið bæði spennandi og lærdómsríkt að keppa um hver hendir minnstu matarmagni. Aðalatriðið er þó að eins margir nemendur og mögulegt er verði meðvitaðir um hvað felst í matarsóun og hvaða áhrif hún hefur á umhverfi okkar og sjálfan hnöttinn,“ segir Elva Ósk Gylfadóttir, starfsmaður verkefnisins Baráttan gegn matarsóun.
Þrátt fyrir að sigurvegarar hafi þegar verið útnefndir verður kennsluefnið áfram aðgengilegt á heimasíðunni, nemendum og kennurum að kostnaðarlausu. Notkunin krefst einungis þess að kennarinn skrái sig á námsgáttina www.nordenskolen.org - líkt og yfir 4000 kennarar víðs vegar um Norðurlöndin hafa þegar gert.
Baráttan gegn matarsóun er styrkt af Norrænu ráðherranefndinni.
Vinningshafar á hinum Norðurlöndunum voru:
Finnland: Jousenkaaren koulu, 7.bekkur
Noregur: Hamnvåg Montessoriskole
Svíþjóð: Sverigefinska skolan i Eskilstuna, 1.bekkur
Danmörk: Søholmskolen, 4.bekkur
