Sænski seðlabankinn: Norðurlönd þurfa hraðari og ódýrari greiðslur yfir landamæri

Þetta var eitt helsta skilaboðið þegar sænski seðlabankinn, Riksbanken, heimsótti Norrænu hagvaxtar- og þróunarnefndina á sumarfundi nefndarinnar í Stokkhólmi.

Elin Ritola, deildarstjóri greiðslugreiningar og nýsköpunar hjá sænska seðlabankanum, benti á að bæði einstaklingar og fyrirtæki standi enn frammi fyrir áskorunum þegar þau inna af hendi greiðslur innan Norðurlanda.

„Þegar greiðsla er innt af hendi yfir landamæri norrænu landanna greiða einstaklingar og fyrirtæki mun hærri gjöld en þegar greiðsla er innt af hendi innan sama lands. Þess vegna er þörf á að gera greiðslur yfir landamæri hraðari og ódýrari,“ sagði Elin Ritola

Norðurlandaráð hefur um árabil unnið að því að styrkja norrænan greiðslumarkað og ryðja úr vegi hindrunum sem gera fólki erfiðara fyrir að búa, starfa og reka fyrirtæki yfir landamæri.

Fyrr á þessu ári samþykkti Norðurlandaráð tilmæli þar sem norrænu ríkisstjórnirnar eru hvattar til að vinna að einfaldari millifærslum á Norðurlöndum.

Á fundinum upplýsti sænski seðlabankinn einnig um það samstarf sem norrænu seðlabankarnir hafa komið á fót til að styrkja greiðsluinnviði á svæðinu. Markmiðið er meðal annars að skapa skilvirkari greiðslulausnir yfir landamæri og tryggja að innlend greiðslukerfi virki betur saman.

„Til að Norðurlönd verði samþættasta svæði heims árið 2030 – og aðeins þrjú og hálft ár eru til stefnu – verða ríkisstjórnir Norðurlanda að leggja áherslu á að samræma fjármálaregluverkið okkar. Jafnframt verða bankarnir að axla meiri ábyrgð gagnvart bæði neytendum og fyrirtækjum sem starfa yfir norræn landamæri,“ sagði Kjell-Arne Ottosson, formaður Norrænu hagvaxtar- og þróunarnefndarinnar.

Umræðan var hluti af áframhaldandi starfi nefndarinnar að því að skapa samþættari norrænan markað til hagsbóta fyrir borgara og fyrirtæki á öllum Norðurlöndum.