Carina Karlsson

Carina Karlsson hefur upp raust sína líkt og loftskeytamaður tilfinninganna í ljóðabókinni Marconirummet („Marconi-herbergið“). Titill bókarinnar vísar til ítalska uppfinningamannsins Guglielmo Marconi, sem fann upp fyrstu þráðlausu skeytasendana og hafði því mikil áhrif á skipaferðir um heimshöfin. Í gluggalausum, hljóðeinangruðum rýmum var komið á sambandi við heiminn fyrir utan skipið. Skilaboð slegin inn með morskóða urðu líflína fyrir skipverjana – en líka fyrir fjölskyldur þeirra í fjarlægri heimabyggð. 

 Í kringum þetta þema vefur Carina Karlsson þéttan vef orða þar sem órólegri og saknaðarfullri tilveru sjómannskonunnar – sem er sígilt viðfangsefni í bókmenntum Álandseyja – er lýst af nánast óbærilegum ákafa. Hvað er að gerast á hafi úti? Daglegt líf einkennist af ótta við að hin goðsagnakennda sjöunda alda, öðrum öldum sterkari, muni orsaka stórslys. Hvernig á að viðhalda félagslegu jafnvægi innan sjómannsfjölskyldu? Þegar faðirinn kemur heim eftir langa dvöl á sjó þekkir ung dóttir hans hann ekki lengur. Drykkja verður flóttaleið út úr einmanaleikanum, aðferð til að „þola fjarlægðina á milli lífs okkar og þess sem við viljum vera“.

 „Til er eyja sem nefnist Sorg,“ skrifar Carina Karlsson. Ljóð hennar eru uppfull af angist, angurværð, gremju og mótbárum með „neyðarkalli á öllum rásum“. Gagnrýnendur hafa kallað Carinu Karlsson Edith Södergran að viðbættri sjávarseltu. Einnig hefur verið bent á bókmenntalegan skyldleika hennar við Tua Forsström. 

 Í Marconirummet má þó líka finna uppljómaðar svipmyndir af samveru systkina í umhverfi bernskunnar, þar sem vatnið lætur allt glitra eins og silfur. Í óreiðu fullorðinslífsins reyna persónurnar að endurheimta þá tilfinningu að „tíminn fljóti hægt gegnum líkamann“. Handan raunsæisins verða ljóðin að tilvistarlegum ástandslýsingum sem bornar eru uppi af mikilli alvöru. 

Carina Karlsson er fædd 1966. Hún ólst upp í Sund á Álandseyjum og er búsett þar. Fyrsta útgefna verk hennar var ljóðabókin Lisbeta, Per Skarps hustru (1996). Síðan hefur hún sent frá sér á annan tug bóka sem tilheyra ýmsum bókmenntagreinum. Karlsson á oft í samstarfi við tónlistar- og myndlistarfólk í verkum sem teygja sig yfir mörk listgreina. Hún vakti mikla athygli með skáldsögunni Märket (2019) sem fjallar um nornaréttarhöldin á Álandseyjum undir lok 17. aldar. Carina Karlsson er margfaldur verðlaunahöfundur og hefur áður verið tilnefnd til bókmenntaverðlauna Norðurlandaráðs fyrir skáldsögurnar Mirakelvattnet (2015) og Algot (2017).