Leiðbeiningar: tímabundin dvöl í Noregi

Norrænir ríkisborgarar sem ferðast til Noregs frá öðru norrænu landi þurfa ekki að sýna fram á dvalarleyfi í Noregi en gætu verið beðnir um að sína skilríki og staðfestingu á ríkisfangi sínu. Því þarftu alltaf að hafa gild persónuskilríki með þér þegar þú ferðast til Noregs.

Ef þú hyggst dvelja í Noregi lengur en í sex mánuði þarftu að tilkynna flutninginn til Noregs og skrá þig í þjóðskrá.

Sérstakar reglur gilda um ferðir til og dvöl á Svalbarða. Þær er að finna í greininni hér að neðan.

Ef þú hvorki býrð né starfar í Noregi og dvelur ekki lengur en sex mánuði í landinu berð þú alla jafna ekki skattskyldu í Noregi. Á því geta þó verið undantekningar. Hafðu samband við Skatteetaten ef þú ert í vafa.

Upplýsingar um skatta er einnig að finna á norrænu skatta- og upplýsingagáttinni (Nordisk eTax).

Að tilheyra almannatryggingakerfi lands þýðir að reglur viðkomandi lands gilda meðal annars um eftirfarandi:

• atvinnuleysisbætur
• lífeyri
• sjúkradagpeninga
• barnabætur
• heilbrigðisþjónustu
• fæðingarorlofsgreiðslur

Meginreglan er sú að þú tilheyrir almannatryggingakerfi þess lands sem þú starfar í. Ef þú ert ekki í vinnu tilheyrir þú að meginreglunni til almannatryggingakerfi búsetulands þíns. Sérstakar reglur gilda þó í sumum tilfellum. Þú skalt því hafa samband við tryggingastofnun í landinu sem þú býrð í ef þú ert í vafa um hvað á við í þínum aðstæðum.

Allir sem dvelja í Noregi fá heilbrigðisþjónustu þegar þörfin er brýn. Ef þú býrð tímabundið í Noregi og veikist eða slasast áttu rétt á að fá læknisþjónustu.

Þótt þú eigir rétt á heilbrigðisþjónustu þarftu að greiða hluta sjúklings af lækniskostnaði („egenandel“). Yfirleitt þarf einnig að framvísa nafnskírteini eða Evrópska sjúkratryggingaskírteininu.

Ef þú getur sýnt fram á að þú hafir fasta búsetu utan Noregs eða að þú dveljir tímaundið í Noregi getur þú flutt inn og notað tímabundið bíl sem skráður er erlendis í Noregi án þess að greiða gjöld.

Þegar ferðast er til Noregs með gæludýr þarf að athuga reglurnar áður en haldið er af stað. Það hvaða reglur gilda getur farið eftir hvaðan þú kemur, hvernig dýr á að ferðast með, aldri dýrsins og fleira.

Hafðu samband við tryggingafélagið þitt til að athuga hvort þú sért tryggð(ur) á meðan þú ert í Noregi.

Til að geta orðið viðskiptavinur banka í Noregi þarftu að geta sýnt frá á hver þú ert. Það gerir þú með því að framvísa gildum persónuskilríkjum og skjölum í bankaútibúi. Að öllu jöfnu þarftu að vera með norska kennitölu eða norskt D-númer til þess að geta stofnað bankareikning í Noregi.

Þú getur fyllt út fyrirspurnareyðublað okkar ef þú hefur spurningar eða hefur lent í hindrunum í öðru norrænu landi.

Ath.! Ef spurningin varðar meðhöndlun tiltekins máls, umsóknar eða persónulegra aðstæðna skaltu hafa samband við viðeigandi yfirvöld.