Skattar í Finnlandi
Almenna reglan er sú að þú greiðir skatt til þess lands sem þú býrð eða aflar þér tekna í. Búir þú í öðru landi en tekna er aflað í, þá geta tekjurnar haft áhrif á skattlagningu þína í búsetulandinu. Þess vegna þarftu að telja fram til skatts allar tekjur frá bæði búsetulandinu og starfslandinu. Við skattlagningu í búsetulandi er þess gætt að þú greiðir ekki skatt tvisvar af sömu tekjum.
Hvenær og hvernig ber þér að greiða skatt í Finnlandi?
Skattlagning í Finnlandi ræðst af því hvort þú berð almenna (ótakmarkaða) eða takmarkaða skattskyldu, hvort þú býrð og starfar á landamærasvæði, hvort þú vinnur fjarvinnu fyrir vinnuveitanda í öðru landi eða vinnur samtímis í fleiri en einu landi. Hér fyrir neðan eru upplýsingar um þær reglur sem gilda um skatta í ýmsum aðstæðum.
Býrð þú og starfar í Finnlandi?
Ef þú býrð og starfar í Finnlandi berðu almenna skattskyldu þar. Almennt skattskyldir einstaklingar í Finnlandi greiða þar stighækkandi skatt af tekjum sínum, sem þýðir að skattprósenta hækkar með vaxandi tekjum. Skattskyldar tekjur eru til dæmis laun, lífeyrir og skattskyldar félagslegar bætur. Með skattprósentureiknivél finnskra skattayfirvalda getur þú reiknað út hver þín skattprósenta er. Tekjur frá öðrum löndum eru ekki teknar með í þeim útreikningum.
Til að greiða skatt þarft þú að hafa skattkort. Nánari upplýsingar um skattkort eru hér fyrir neðan, undir fyrirsögninni „Skattkort“.
Býrð þú eða starfar í öðru norrænu landi?
Ef þú býrð á Norðurlöndum og starfar í öðru norrænu landi en búsetulandinu berðu yfirleitt almenna skattskyldu í búsetulandi þínu og takmarkaða skattskyldu í starfslandinu. Þá þarftu að gera grein fyrir tekjunum í báðum löndum og við skattlagningu í búsetulandinu er yfirleitt séð til þess að ekki sé tekinn af þeim tvöfaldur skattur. Nánari upplýsingar eru á vefsvæði norrænu skattagáttarinnar (Nordisk eTax).
Einstaklingar með takmarkaða skattskyldu greiða tekjuskatt af launatekjum sínum eins og aðrir. Nánari upplýsingar eru á vefsvæði norrænu skattagáttarinnar (Nordisk eTax).
Einstaklingar með takmarkaða skattskyldu geta óskað eftir því að greiða stighækkandi skatt í stað hefðbundins tekjuskatts, en þá getur skattprósenta breyst í hlutfalli við meðal annars heildartekjur og skattafrádrátt á árinu. Einstaklingar sem greiða stighækkandi skatt eiga til dæmis rétt á að telja kostnað vegna ferðalaga milli heimilis og vinnustaðar og rekstrarútgjöld fram til skattafrádráttar. Nánari upplýsingar eru á vefsvæði norrænu skattagáttarinnar (Nordisk eTax).
Til að greiða skatt þarft þú að hafa skattkort. Nánari upplýsingar um skattkort eru hér fyrir neðan, undir fyrirsögninni „Skattkort“.
Ef þú bæði býrð og starfar í Finnlandi skaltu leita nánari upplýsinga á vefsvæði finnskra skattayfirvalda (Verohallinto).
Ef þú býrð eða starfar í öðru norrænu landi skaltu leita nánari upplýsinga á vefsvæði norrænu skattagáttarinnar (Nordisk eTax).
Ef þú ert útsendur starfsmaður í öðru landi á vinnuveitandinn að kynna sér í hvaða landi þér ber að greiða skatt.
Þegar um stutt starfstímabil erlendis er að ræða eru laun oft skattlögð í því landi sem starfsmaður var sendur frá, en ef fyrirtækið stofnar varanlegt útibú í starfslandinu geta yfirvöld þar líka skattlagt laun starfsmannsins þó að um stutta dvöl sé að ræða.
Sé um lengra starfstímabil erlendis að ræða getur svokölluð sex mánaða regla gilt um launin.
Nánari upplýsingar færðu hjá Norrænu skattagáttinni og hjá skattayfirvöldum í norrænu löndunum.
Kveðið er á um skattlagningu þeirra sem búa á landamærasvæðum Finnlands, Svíþjóðar eða Noregs og sækja vinnu yfir landamæri í Norræna tvísköttunarsamningnum. Viss skilyrði þurfa að vera uppfyllt til að fólk teljist sækja vinnu yfir landamæri í þeim skilningi sem lagður er í hugtakið í norræna tvísköttunarsamningnum.
Býrð þú og starfar á landamærasvæði?
Ef þú býrð í einu landi og starfar í öðru ber þér að greiða skatt af launatekjum í búsetulandinu ef þú býrð við landamæri Finnlands og Svíþjóðar eða Finnlands og Noregs og vinnustaðurinn er í sama sveitarfélagi en handan landamæranna. Að auki er skilyrði að þú dveljir reglulega, minnst tvo daga í viku, í föstu húsnæði þínu í búseturíkinu.
Til sveitarfélaga á landamærum Finnlands og Svíþjóðar teljast Finnlandsmegin Tornio, Ylitornio, Pello, Kolari, Muonio og Enontekiö og Svíþjóðarmegin Haaparanta, Övertorneå, Pajala og Kiiruna.
Til sveitarfélaga á landamærum Finnlands og Noregs teljast Noregsmegin Enontekiö, Inari og Utsjoki og Noregsmegin Karasjok, Kautokeino, Kåfjord, Nesseby, Nordreisa, Storfjord, Sør-Varanger og Tana.
Nánari upplýsingar eru á vefsvæði finnskra skattayfirvalda (Verohallinto).
Býrð þú ekki og starfar á landamærasvæði?
Ef þú býrð í einu landi og starfar í öðru, en býrð ekki á landamærasvæði, greiðir þú yfirleitt tekjuskatt í starfslandinu. Nánari upplýsingar eru í undirkaflanum Vinnandi fólk.
Um skattskyldu gildir almennt sú regla að skatt beri að greiða í búsetulandi, einnig af tekjum sem aflað er með vinnu í öðru landi. Tekjur eru yfirleitt einnig skattskyldar í starfslandinu. Telja þarf tekjur fram bæði í starfs- og búsetulandi, en Norræni tvísköttunarsamningurinn kemur almennt í veg fyrir að sömu tekjur séu skattlagðar tvisvar. Nánari upplýsingar eru á vefsvæði norrænu skattagáttarinnar (Nordisk eTax).
Ef þú hefur starfsstöð í Finnlandi og stundar fjarvinnu fyrir vinnuveitanda í öðru landi, í fullu starfi eða hlutastarfi, skaltu leita þér frekari upplýsinga á vef finnskra skattayfirvalda (Verohallinto). Ef þú stundar fjarvinnu fyrir vinnuveitanda í Finnlandi og hefur starfsstöð í öðru landi skaltu hafa samband við skattayfirvöld í viðkomandi landi.
Nánari upplýsingar um skattlagningu á fjarvinnu finnur þú á vef finnskra skattayfirvalda (Verohallinto).
Í Finnlandi þarf ekki að greiða skatt af mánaðarlegum námsstyrk frá öðru norrænu landi. Finnskur námsstyrkur þinn er heldur ekki skattskyldur í Finnlandi ef þú hefur engar aðrar tekjur. Nánari upplýsingar eru á vefsvæði finnskra skattayfirvalda (Verohallinto).
Styrkir vegna náms, rannsókna eða listiðkunar geta talist til skattfrjálsra tekna í Finnlandi. Nánari upplýsingar eru á vefsvæði finnskra skattayfirvalda (Verohallinto).
Ef þú býrð í Finnlandi og þiggur þar styrk frá öðru landi, eða kemur til Finnlands til náms eða starfsþjálfunar á styrk, þá er hugsanlegt að skattasamningur milli Finnlands og hins landsins hafi áhrif á hvar þér ber að greiða skatt af styrkfénu. Samkvæmt skattasamningum tekur Finnland alla jafna ekki skatt af erlendum starfsnemum, s.s. af styrkjum sem þeir þiggja frá heimalandinu eða Evrópusambandinu. Nánari upplýsingar eru á vefsvæði finnskra skattayfirvalda (Verohallinto).
Ef þú stundar doktors- eða löggildingarnám , rannsóknir eða listatengda starfsemi og þiggur til þess styrk frá finnska ríkinu skaltu huga að tryggingum þínum meðan námið eða starfsemin stendur yfir. Nánari upplýsingar eru á síðunni Fræðafólk og styrkþegar í Finnlandi.
Ef þú býrð í öðru norrænu landi en þiggur lífeyri frá Finnlandi eru lífeyrisgreiðslurnar skattskyldar í Finnlandi. Þó þarf einnig að gera grein fyrir lífeyrisgreiðslunum á skattframtali í búsetulandinu.
Ef þý bjóst í Finnlandi og þáðir lífeyrisgreiðslur frá öðru norrænu landi fyrir 4.4.2008 er lífeyririnn skattlagður í því landi svo lengi sem þú býrð samfleytt í Finnlandi. Ef þú fluttir til Finnlands eða hófst lífeyristöku eftir 4.4.2008 er lífeyrir þinn frá öðru landi skattlagður í Finnlandi.
Nánari upplýsingar eru á vefsvæði norrænu skattagáttarinnar (Nordisk eTax).
Eigir þú eignir eða fjárfestingar í öðru norrænu landi getur þú fundið upplýsingar um skattlagningu þeirra á Norrænu skattagáttinni(Nordisk eTax).
Fáir þú arf eða gjöf frá Finnlandi geturðu fundið upplýsingar um skattlagningu á vef finnskra skattayfirvalda (Verohallinto).
Nánari upplýsingar um bifreiðaskatt eru á síðunni Ökutæki í Finnlandi.
Eru tekjur þínar skattlagðar tvisvar?
Ekki þarf að greiða sama skatt í tveimur mismunandi löndum af sömu tekjunum, en þó ber að gera grein fyrir tekjunum í bæði starfs- og búsetulandi. Í Norræna tvísköttunarsamningnum er kveðið á um það hvaða land megi skattleggja tekjur og hvernig forðast eigi tvísköttun. Nánari upplýsingar eru á vefsvæði norrænu skattagáttarinnar (Nordisk eTax).
Skattkort í Finnlandi
Í Finnlandi þarf launafólk að framvísa skattkorti til vinnuveitanda svo að hægt sé að áætla þá skattprósentu sem haldið er eftir. Framvísir þú ekki skattkorti til vinnuveitanda ber honum alla jafna skylda til að halda eftir 60 prósentum launa vegna skatts.
Ef þú berð takmarkaða skattskyldu í Finnlandi skaltu sækja um staðgreiðsluskattkort fyrir takmarkað skattskylda einstaklinga. Ef þú vilt frekar greiða stighækkandi skatt skaltu sækja um almennt skattkort fyrir takmarkað skattskylda einstaklinga, í staðinn fyrir staðgreiðsluskattkort. Nánari upplýsingar um skattkort eru á vefsvæði norrænu skattagáttarinnar (Nordisk eTax).
Upplýsingar um að útvega skattkort eru á heimasíðu finnskra skattayfirvalda (Verohallinto).
Skattframtal í Finnlandi
Einstaklingum sem bera almenna skattskyldu í Finnlandi, svo og sumum sem hafa þar takmarkaða skattskyldu, ber að telja fram til skatts í landinu.
Þarft þú að telja fram til skatts í Finnlandi?
Hver sá sem hefur fasta búsetu í Finnlandi, er þar almennt skattskyldur og hefur haft skattskyldar tekjur árið áður, skal skila þar skattframtali.
Ef þú hefur fasta búsetu í öðru landi og takmarkaða skattskyldu í Finnlandi skaltu skila skattframtali í Finnlandi í eftirtöldum tilvikum:
- ef þú hefur átt fasteign í Finnlandi á skattaárinu
- ef þú hefur stundað atvinnustarfsemi á föstum starfsstað í Finnlandi
- ef þú hefur óskað eftir stighækkandi skattlagningu í stað þess að notast við skattkort
Hvernig er skattframtali skilað?
Skattskyldir einstaklingar í Finnlandi fá fyrirfram útfyllt skattframtal sent í pósti á vormánuðum. Þar koma fram upplýsingar um tekjur þínar, skatta og frádrátt. Teljir þú að upplýsingarnar á eyðublaðinu séu réttar og að engu þurfi við þær að bæta þarft þú ekki að aðhafast frekar. Ef eitthvað þarf hins vegar að leiðrétta ber þér að tilkynna um það innan þess frests sem gefinn er upp.
Tekjur frá öðrum löndum birtast alla jafna ekki á fyrirfram útfylltu skattframtali. Þó er skylt að greina frá tekjum frá öðrum löndum á framtalinu. Nánari upplýsingar um skattframtal eru á síðum finnskra skattayfirvalda (Verohallinto) og Norrænu skattagáttarinnar (Nordisk eTax).
Hvað ef þú flytur?
Ef þú hefur flutt til Finnlands í lok tekjuárs og hefur ekki fengið fyrirfram útfyllt skattframtal heimsent skalt þú skila framtali þínu á eyðublaði sem hægt er að prenta út á vefsvæði finnska skattsins (Verohallinto). Nánari upplýsingar um skattframtal eru á vef Norrænu skattagáttarinnar (Nordisk eTax).
Hafir þú flutt milli landa á árinu ber þér að skila skattframtali bæði í brottfararlandinu og því landi sem þú flytur til. Þú þarft að skila skattframtali í Finnlandi í þann tíma sem þú berð almenna skattskyldu í landinu.
Ef þú ert finnskur ríkisborgari sem hefur flutt til annars lands berð þú vanalega almenna skattskyldu í Finnlandi það ár sem flutt er og næstu þrjú árin á eftir. Almennri skattskyldu í Finnlandi getur þó lokið fyrr ef þú sýnir fram á að þú hafir ekki haft nein skattaleg tengsl við Finnland á viðkomandi skattlagningarári . Nánari upplýsingar um almenna skattskyldu eru á vef Norrænu skattagáttarinnar (Nordisk eTax).
Nánari upplýsingar
Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.
ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.