Norðurlandaráð ræddi lýðræðismál við stjórnmálamenn frá Hvíta-Rússlandi

Fundurinn í Stokkhólmi var framhald á þeirri hefð Norðurlandaráðs að hitta árlega pólitíska leiðtoga frá Hvíta-Rússlandi. Mættir voru bæði fulltrúar stjórnarandstöðunnar í Hvíta-Rússlandi og þingmenn ásamt fulltrúum frjálsra félagasamtaka.

„Þessir fundir milli aðila frá Hvíta-Rússlandi eru mikilvægir að mati Norðurlandaráðs og við leggjum upp úr því að bjóða fram vettvang þar sem þeir geta komið saman. Við viljum vinna að lýðræðislegri þróun í Hvíta- Rússlandi og að því að viðhalda samtalinu sem á sér stað milli aðila,“ segir Jessica Polfjärd, forseti Norðurlandaráðs, sem var gestgjafi fundarins.

Hún lagði áherslu á að staðan í Hvíta-Rússlandi væri enn alvarleg.

„Við höfum miklar áhyggjur af því að sótt sé að funda- og félagafrelsi og tjáningarfrelsi ásamt þeirri ógn sem steðjar að fjölmiðlum. Við höfum einnig áhyggjur af því hvernig farið er með jaðarkynverundarhópa.“ Sumar skýrslur benda til þess að Hvíta-Rússland sé meðal þeirra landa sem verst eru fyrir samkynhneigða.

Jessica Polfjärd lagði áherslu á að Hvíta-Rússland væri nálægt Norðurlöndunum og Eystrasaltsríkjunum landfræðilega og einnig að vissu leyti menningarlega og hún benti á að stytta mætti bilið enn frekar ef landið þróaðist meira í átt til lýðræðis.

Fulltrúar Eystrasaltsríkjaráðsins (samstarfsvettvangur hinna þriggja þinga Eystrasaltsríkjanna) og fulltrúar þingmannaráðstefnu Eystrasaltsríkjanna, BSPC og skrifstofu Norrænu ráðherranefndarinnar í Vilníus tóku einnig þátt í fundinum.

Fulltrúar Norðurlandaráðs voru Jessica Polfjärd (flokkahópi hægrimanna), Gunilla Carlsson varaforseti (flokkahópi jafnaðarmanna), Erkki Tuomioja, (skýrslugjafi Norðurlandaráðs um Hvíta-Rússland, flokkahópi jafnaðarmanna), Pyry Niemi (flokkahópi jafnaðarmanna) Hans Wallmark (flokkahópi hægrimanna) og Jorodd Asphjell (flokkahópi jafnaðarmanna og forseti BSPC).