Pivinnguaq Mørch

Pivinnguaq Mørch
Photographer
Angu Motzfeldt
Pivinnguaq Mørch: Arpaatit qaqortut. Smásögur og ljóð, Milik Publishing, 2015. Tilnefndur til bókmenntaverðlauna Norðurlandaráðs 2019.

Rökstuðningur:

Bókin Arpaatit qaqortut („Hvítu hlaupaskórnir“) er safn 9 smásagna og 14 ljóða með tilvistarlegu ívafi sem fjalla um áskoranir daglegs lífs. 

Hér kynnumst við rödd ljóðmælanda og sögumanns sem ferðast milli ólíkra stemninga og atburða og lýsir lífi fullorðins manns sem hleypur. Hann hleypur fyrir lífi sínu og samband hans við lengd hlaupsins og sinn eigin líkamlega styrk eða veikleika (lesandinn kemst að því að hann er veikur) leiðir lesandann inn í þá hluta smásagnasafnsins sem innihalda einnig ljóð. 

Ljóðin á milli smásagnanna eru eins konar hugleiðingar um tilveruna eins og henni er lýst í smásögunum. Sjónarhornið flyst frá manninum í hlaupaskónum til barns sem furðar sig á stórum maga mömmu sinnar. Hér er fjallað um lítið líf sem verður sífellt stærra, þar sem fjölskyldu- og vinatengsl eru í brennidepli – og það hvernig hægt er að ruglast í ríminu af skilaboðum á Facebook. Einnig heyrum við athugula rödd segja frá strætóferð niður í bæ. Þetta eru öll hin smáu og stóru augnablik hversdagsins sem við veltum yfirleitt ekki fyrir okkur, en þegar við lesum um „hugsun sem er beitt eins og hnífur, sem getur skorið gegnum ekki bara sálina heldur líka flegið klæðin af landinu“ er spurningin þessi: hvað gerum við hvert öðru í þessu lífi? Það sem blæs lífi í textann er nándin í grænlensku samfélagi.

Er eitthvað til sem er stærra en við, þetta litla mannfólk? Og finnum við til samkenndar hvert með öðru eða fljótum við bara með straumnum, jafnvel þegar við finnum sem mest til? 

Pivinnguaq Mørch er fæddur árið 1993 í Upernavik. Hann er einn hinna ungu grænlensku höfunda sem hafa skipað sér sess í grænlenskum bókmenntum með vel skrifuðum, krefjandi og samfélagsgagnrýnum verkum. Hann flytur lesendur sína inn í heim sem þeir hafa fram að því aðeins rennt grun í.