EXPO 2025: Alþjóðlegt samstarf á Norðurskautssvæðinu

Ljósmyndari

Norden

Loftslagsbreytingar, tækniframfarir og ný staða heimsmála stuðla að hraðari breytingum á Norðurskautssvæðinu en nokkru sinni fyrr. Þessu fylgja miklar áskoranir en jafnframt ný samstarfstækifæri. Þetta áréttuðu margir á Norðurlanda- og Norðurskautsdeginum á EXPO 2025 í Osaka í Japan.

„Norræni skálinn sýnir glöggt hverju norrænu löndin geta áorkað í sameiningu. Ég hlakka til dagsins í dag, þar sem áherslan verður á Norðurskautssvæðinu. Og ég vona að Japan og norrænu löndin geti stuðlað að lausnum fyrir Norðurskautssvæðið,“ sagði Viktoría krónprinsessa af Svíþjóð á Norðurlanda- og Norðurskautsdeginum í norræna skálanum á EXPO 2025 í Japan.

Því næst hélt Anders Adlercreutz, menntamála- og samstarfsráðherra Finnlands, setningarræðu fyrir hönd Finnlands sem formennskulands í Norrænu ráðherranefndinni. Ráðherrann lagði strax áherslu á mikilvægi norræns og alþjóðlegs samstarfs á tímum þegar loftslagsmál, tækniþróun og viðbúnaðarmál móta framtíð Norðurskautssvæðisins.

Við megum ekki gleyma því að þótt Norðurskautssvæðið virðist fjarlægt í landfræðilegum skilningi þá er heimurinn samtengdur. Viðbúnaður og sjálfbærar lausnir fyrir Norðurskautssvæðið krefjast samstarfs.

Anders Adlercreutz, menntamála- og samstarfsráðherra Finnlands

Dagurinn leiddi saman konunglega fulltrúa, ráðherra, hátt setta embættismenn, leiðtoga úr atvinnulífinu og vísindamenn frá Norðurlöndum og Japan. Saman ræddu þeir hvernig samstarf gæti stuðlað að sjálfbærri þróun á Norðurskautssvæðinu og skapað verðmæti bæði fyrir fólk og náttúru.

Á Norðurskautssvæðinu er einnig að finna lausnir

Karen Ellemann, framkvæmdastjóri Norrænu ráðherranefndarinnar, lagði í ávarpi sínu áherslu á að Norðurskautssvæðið sé órjúfanlegur hluti af norrænni sjálfsmynd og að samvinna skipti sköpum fyrir svæðið. Jafnframt benti hún á að svæðið standi í dag frammi fyrir miklum úrlausnarefnum í tengslum við loftslagsbreytingar, geópólitíska spennu og álag á náttúruauðlindir. En á svæðinu er einnig til staðar samvinna og nýsköpun sem skilar raunverulegum árangri.

„Í meira en 20 ár hefur Norðurskautssvæðið verið forgangsmál hjá Norrænu ráðherranefndinni. Svæðið leikur lykilhlutverk í norrænni landafræði og sjálfsmyn. Það er ánægjulegt að við hér í norræna skálanum á EXPO 2025 getum ásamt Japan myndað ný og sterk tengsl, norðurslóðum til heilla,“ sagði Karen Ellemann, framkvæmdastjóri Norrænu ráðherranefndarinnar.