Gæti þang orðið framtíðarpróteingjafi Norðurlanda?
Eftir því sem álag á matvælakerfi heimsins eykst er litið til þangs sem lofandi sjávarauðlindar sem gætt stutt við bæði sjálfbærni og fæðuöryggi á Norðurlöndum. Hvað ef hluti lausnarinnar um sjálfbærari og viðnámsþolnari matvælakerfi vex nú þegar meðfram strandlengjum okkar?
Af hverju leita Norðurlönd lausna í hafinu?
Matvælakerfi heimsins standa frammi fyrir auknu álagi vegna loftslagsbreytinga, geopólitísks óstöðugleika og aukinnar eftirspurnar og norrænu löndin leita að sjálfbærum og staðbundnum próteingjöfum – þar á meðal í hafinu. Í þessu samhengi hefur þang verið nefnt sem mögulegur valkostur.
Sjálfbær stjórnun hafsins sem stuðlar að hnattrænum lausnum er lykiláhersla Norrænu ráðherranefndarinnar og það fellur vel að þeirri stefnu að kanna hlutverk þangs í matvælakerfum.
Þótt þang sé ekki eitt og sér lausn á próteinþörf getur það stutt við sjálfbæra stjórnun hafsins, aukna fjölbreytni og seiglu í norrænum matvælakerfum – einkum þegar það er nýtt samhliða öðrum jurta- og sjávarauðlindum.
Hvað kemur þang með að borðinu?
Samkvæmt skýrslunni Seaweeds for food: from production to consumer getur þang verið verðmætt hráefni í matvælum. Það er í eðli sínu hitaeiningasnautt en ríkt af örnæringarefnum og sumar tegundir, einkum rauðþörungar, innihalda sambærilegt magn próteins og belgjurtir, baunir og soja.
Skýrslan bendir þó einnig á mikilvægar áskoranir. Joðinnihald takmarkar hversu mikið er óhætt að nota af brúnþörungum og viðhorf neytenda er annar afgerandi þáttur: bragð, útlit og áferð munu ráða miklu um árangur.
Hvað þarf til að ná árangri?
Samkvæmt rannsókninni er þörf á frekari rannsóknum. Þar á meðal eru fleiri rannsóknir á fólki til að skilja betur heilsufarsáhrif, örugg neyslumörk og viðhorf neytenda áður en þang getur orðið fastur liður á norrænum matarborðum.
Niðurstaða skýrslunnar er að með réttri umgjörð gæti þang orðið meira en sérhæft jaðarhráefni og verðmætur hluti af viðnámsþolnari og sjálfbærari norrænum matvælakerfum – með rætur í hafinu.
