Öflugra samstarf um öryggi mikilvægra neðansjávarinnviða
Ingrid Zetterman, innviða- og ESB-ráðherra, Álandseyjum, Inga Bērziņa, ráðherra snjallrar stjórnsýslu og byggðamála, Lettlandi, Liisa-Ly Pakosta, ráðherra dómsmála og stafrænna málefna, Eistlandi, Erik Slottner, ráðherra opinberrar stjórnsýslu, Svíþjóð, Karen Ellemann, framkvæmdastjóri Norrænu ráðherranefndarinnar, Anna-Kaisa Ikonen, sveitastjórnaráðherra, Finnlandi, Caroline Stage Olsen, ráðherra stafrænna málefna, Danmörku.
Í sameiginlegri yfirlýsingu ráðherranna segir að neðansjávarinnviðir vegna rafrænna fjarskipta teljist til mikilvægra innviða og sýni meðal annars mikilvægi sameiginlegrar nálgunar norrænu og baltnesku landanna þegar kemur að samstarfinu við ESB og NATO.
„Öruggir stafrænir innviðir eru forsenda fyrir samkeppnishæfi landa okkar og nauðsynlegir til að uppfylla þarfir landanna þegar kemur að rafrænum samskiptum og aðgengi að stafrænni þjónustu. Öflug og umfangsmikil kerfi sæstrengja skipta sköpum á ólgu- og óvissutímum,“ sagði Erik Slottner, ráðherra opinberrar stjórnsýslu og stafvæðingar í Svíþjóð.
Öflug og umfangsmikil kerfi sæstrengja skipta sköpum á ólgu- og óvissutímum
Aukin samvinna Norðurlanda og Eystrasaltsríkjanna stuðlar að auknu öryggi á svæðinu og uppfyllingu framtíðarsýnar Norrænu ráðherranefndarinnar um að svæðið verði það samþættasta í heimi árið 2030 í stafrænu tilliti. Karen Ellemann, framkvæmdastjóri Norrænu ráðherranefndarinnar, segir hina sameiginlegu yfirlýsingu gott dæmi um það hvernig við eflum viðnámsþrótt á svæðinu með því að vinna saman.
„Við erum samþætt svæði og erum því mjög háð hvert öðru. Það styrkir okkur. Að sama skapi getur það veikt okkur ef við nálgumst málin ekki sem heildstætt svæði. Norræna ráðherranefndin mun spýta í lófana í því verkefni sínu að leiða saman hlutaðeigandi aðila þegar kemur að viðnámsþrótti og skapa vettvang fyrir pólitískar viðræður og samstarf,“ sagði Ellemann.
Norræna ráðherranefndin mun spýta í lófana í því verkefni sínu að leiða saman hlutaðeigandi aðila þegar kemur að viðnámsþrótti og skapa vettvang fyrir pólitískar viðræður og samstarf
Með yfirlýsingunni lýsir ráðherranefndin stuðningi við sameiginlega yfirlýsingu frá New York um öryggi og viðnámsþol sæstrengja í stafvæddum heimi, „New York Joint Statement on the Security and Resilience of Undersea Cables in a Globally Digitalized World“, þar sem sett eru fram alþjóðleg viðmið til að tryggja að fjarskiptainnviðir neðansjávar séu öruggir, traustir, sjálfbærir og viðnámsþolnir.
