Isabella Nilsson

„Það sem ekki er hægt að tala um, um það þarf að þegja,

                             skrifaði Wittgenstein.

Það sem ekki er hægt að tala um, um það þarf að vitleysast,

                             skrifaði Bullprinsessan.“

Rökstuðningur:

Nonsensprinsessans dagbok á sér tvo höfunda. Annar þeirra, Isabella Nilsson, er fárveik af anorexíu og nýbúin að lofa mömmu sinni að fyrirfara sér ekki næsta árið. Meðhöfundur hennar, Bullprinsessan, hjálpar henni að efna loforðið. Í dagbók sem nær yfir þennan tólf mánaða langa gálgafrest skiptast á lýsingar á hversdegi sjúklings á átröskunar- og geðdeildum þar sem orðsnilldin er allt annað en hversdagsleg – bullljóðræn, rímandi og hreinn og klár vitleysisgangur.

Bullprinsessan, hliðarsjálf höfundar sem birtist þegar kvíðinn og ofsóknaróttinn gera úti um alla röklega hugsun, hefur tungumálið sem verkfæri – eða kannski frekar sem töfrasprota. Það er ekki hægt að rökræða við órólegan huga en það er hægt að hafa ofan af fyrir honum með rími og söngli, hugarleikfimi og orðagátum. Í hlutverki Bullprinsessunnar sýnir Isabella Nilsson slíka orðsnilld – að ekki sé minnst á hugkvæmni – að lesandinn fer að sjá bæði tungumálið og heiminn í nýju ljósi. Textinn er sprottinn úr bæði hefðbundinni ljóðlist og vestrænni bókmenntahefð en snýr þessum fyrirbærum jafnframt ástúðlega á haus. Stuðlar og höfuðstafir verða að jaðaríþrótt í meðförum höfundar, hún dustar rykið af klisjum svo að þær glansa á ný og færir hina smánuðu kúnst orðskviðanna aftur til nútímans.

Um leið mynda þessar leiftrandi ljóðaraðir frásögn um hið dimmasta og erfiðasta af öllu, það ástand sem felst í sjúkdóminum og er allt annað en skáldlegt. Það er ekkert töfrum líkt eða merkingarþrungið við það að svelta sig í hel, en kannski megi finna bæði töfra og merkingu í þeim aðferðum sem beita má til að halda sér á lífi. Í Nonsensprinsessans dagbok er ljóðið bæði leikur og haldreipi lífsins, hrífandi skemmtileg og óróleg áminning um þá óendanlegu möguleika sem tungumálið og sköpunargleðin hafa til að gera mannlega tilveru bærilegri.

Isabella Nilsson er fædd 1989 og býr í Skövde. Frumraun hennar, Verklighetsprojektet (X Publishing), kom út 2011. Hún hefur einnig þýtt bullljóð eftir Lewis Carroll (Snarkjakten, Ellerströms, 2014), Edward Lear og Mervyn Peake og skrifað bókina Det hungriga slottet (X Publishing, 2013), fjarstæðukennda sögubók fyrir fullorðna, ásamt myndskreytinum Kristin Lidström.