Einkunnir í íslenska menntakerfinu

Samkvæmt aðalnámskrá grunnskóla á mat á hæfni og framförum nemenda að vera reglubundinn þáttur í skólastarfi. Megintilgangur námsmats er að kanna stöðu nemenda, nota niðurstöður til að leiðbeina þeim um námið og hvernig þeir geti náð markmiðum þess. Í aðalnámskrá grunnskóla eru matsviðmið sett fram fyrir námsgreinar, námssvið og lykilhæfni. Matsviðmið eru lýsing á, hversu vel nemandi hefur skilgreinda hæfni, á valdi sínu. Vitnisburður við lok 10. bekkjar er hafður til hliðsjónar við innritun nemenda í framhaldsskóla og val á námsbrautum.

Matsviðmið lýsa hæfni á kvarða, notaður er kvarðinn A, B+, B, C+, C og D. 

Nánar má lesa um hæfniviðmið, námsmat og matsviðmið á heimasíðu Menntamálastofnunnar. 

Almennir framhaldsskólar starfa eftir aðalnámskrá framhaldsskóla. Í henni er að finna upplýsingar um markmið og skipulag námsbrauta og námsgreina. Þar eru einnig ýmsar reglur er varða réttindi og skyldur nemenda og skóla. Allir framhaldsskólar gefa út sínar eigin skólanámskrár. Í þeim eru birtar nánari upplýsingar um starfssemi hvers skóla, námsframboð, skólareglur og þjónustu þá sem nemendum stendur til boða. Skólanámskrár má finna á vefsíðum skólanna.Misjafnt er milli framhaldsskóla hvernig námsmati og einkunnagjöf er háttað. 

Flestir háskólar á Íslandi gefa einkunnir í heilum eða heilum og hálfum tölum frá 0 - 10. Aðaleinkunn er vegið meðaltal allra einkunna til lokaprófs og reiknast hún með tveimur aukastöfum. Hægt er að finna upplýsingar um einkunnagjöf, einingamat og einkunnir í kennsluskrá háskóla.