Ferðast með hund eða kött til Álandseyja

Ferðalög með gæludýr krefjast skipulags og mikilvægt er að fylgja reglum um innflutning dýra til að forðast útbreiðslu sjúkdóma. Mikilvægt er að muna að eigandi dýrs sem flutt er til Álandseyja frá öðru landi þarf að fylgja reglum um innflutning dýra óháð því hvort um er að ræða frí eða flutning. Til gæludýra teljast hundar, kettir og frettur. 

Reglur um ferðir með gæludýr eru mismunandi eftir því hvaðan dýrið kemur. Leyfilegt er að flytja gæludýr til Álandseyja frá ESB-landi, Noregi og Sviss ef dýrið er með:

• Örflögumerkingu
• Gilda bólusetningu gegn hundaæði
• Vottorð um meðhöndlun gegn sullafársbandormi (echinococcus multilocularis)
• Evrópska gæludýravegabréfið

Kröfurnar gilda um flutning gæludýra með ferðalangi sem ekki hyggst selja eða framselja dýrið öðrum. 

Ekki þarf að tilkynna gæludýrið til tollyfirvalda eða tollafgreiða það. Tollyfirvöld geta aftur á móti athugað dýrið og fylgiskjöl þess. Farðu yfir fylgiskjöl, bólusetningar og gildandi innflutningskröfur með góðum fyrirvara og hafðu samband við dýralækni ef þörf krefur. Ef innflutningskröfur eru ekki uppfylltar telst innflutningurinn vera ólöglegur, sem getur leitt til sóttkvíar dýrsins, sendingu þess aftur til brottfaralandsins eða aflífunar þess.

Lesa má nánar um kröfur um innflutning gæludýra til Álandseyja á vefsíðum landsstjórnar Álandseyja og Livsmedelsverket.

Leyfilegt er að flytja eigið gæludýr frá Íslandi og löndum utan ESB, en fylgja þarf sérstökum reglum. Á vefsíðu Livsmedelsverket er að finna upplýsingar um ferðalög með gæludýr frá Íslandi og löndum utan ESB.

Þegar komið er til Álandseyja frá landi utan ESB á að velja rauðu röðina og framvísa gæludýrinu og viðeigandi fylgiskjölum fyrir tollyfirvöldum. Þegar flutt er til Álandseyja þarf einnig að skila búslóðarinnflutningsskýrslu fyrir dýrið. Sjá nánar á vefsíðu tollyfirvalda um gæludýr.

Ekki þarf leyfi til að flytja eigið dýr. Flutningurinn þarf hins vegar að fylgja lögum og reglugerð um flutning dýra. Reglugerðin gildir um allar tegundir dýra á Álandseyjum, milli Álandseyja og Finnlands og milli Álandseyja og annarra landa. Í reglugerðinni eru ákvæði um m.a. útbúnað ökutækisins sem dýrið er flutt í, flutningstíma og velferð dýrs meðan á flutningi stendur. Lesa má reglugerðina á vef landsstjórnar Álandseyja.

Flutningur lifandi dýra í atvinnuskyni, sem þú átt ekki sjálf(ur), krefst leyfis frá umhverfis- og heilbrigðisstofnun Álandseyja (ÅMHM). Til að fá leyfi þarftu að geta sýnt fram á að hafa staðist námskeið í dýraflutningum. Við langferðaflutninga þarf ökutækið einnig að vera samþykkt af ÅMHM. Sjá nánar á vefsíðu ÅMHM um dýraflutninga.

Þegar ferðast er með gæludýr frá Álandseyjum innan til ESB, Noregs eða Sviss þarf dýrið að hafa gilt vottorð um meðhöndlun gegn bandormi (echinococcus) og bólusetningu gegn hundaæði sem og ESB-gæludýravegabréf. Athugaðu alltaf gildandi reglur í því landi sem þú hyggst ferðast til og fylgigögn og bólusetningar dýrsins með góðum fyrirvara.

Ef ferðast er með gæludýr með það fyrir augum að skilja það eftir hjá nýjum eiganda erlendis þarf dýrið að gangast undir læknisskoðun hjá ÅMHM fyrir brottför og ferðin skráð í svonefnt Traces-kerfi.

DOCOM-skjal þarf fyrir keppnisferðir með hesta frá Álandseyjum til Svíþjóðar, Noregs eða Danmerkur. Skjalið gildir í 10 daga og hesturinn þarf að vera kominn aftur á brottfararstað innan þess tíma. Til að fá DOCOM-skjal þurfa allar viðeigandi upplýsingar að vera skráðar í Traces-kerfinu. Ferðir með hesta í meira en 10 daga skulu skráðar í Traces-kerfið og krefjast heilbrigðisvottorðs frá ÅMHM.

Nánari upplýsingar um ferðir til annarra landa með gæludýr eða hest fást á vefsvæði ÅMHM.

Á vefsíðum Info Norden má finna upplýsingar í tengslum við að ferðast með gæludýr annars staðar á Norðurlöndum og þær stofnanir sem leita skal til vegna spurninga.