Að ferðast með hund eða kött til Finnlands

Sömu reglur gilda um ferðalög með hunda, ketti og frettur óháð því hvort um er að ræða flutninga til Finnlands, viðkomu í Finnlandi eða tímabundið ferðalag þangað. Mismunandi reglur gilda um gæludýr sem ferðast ein og gæludýr sem ferðast með fólki og einnig gilda sérstakar reglur um innflutning dýra til sölu.

Til að tryggja að ferðalag þitt með hund, kött eða frettu gangi sem greiðlegast ættir þú að kynna þér reglur um slík ferðalög með góðum fyrirvara.

Mismunandi reglur gilda einnig um ferðalög með gæludýr til Finnlands eftir því hvort dýrið kemur frá ESB-landi, Noregi eða Íslandi.

Ekki er leyfilegt að flytja hvolpa eða kettlinga undir sex mánaða aldri til Finnlands ef ætlunin er að selja eða afhenda öðrum dýrið innan fjögurra mánaða frá innflutningi þess. Bannið varðar hvolpa og kettlinga sem komið er með frá Evrópusambandslöndum eða frá löndum utan Evrópusambandsins. Nánari upplýsingar eru á vefsvæði finnsku matvælastofnunarinnar (Ruokavirasto).

Ferðalög með gæludýr frá ESB-löndum og Noregi til Finnlands

Eftirfarandi reglur gilda um ferðalög með hunda, ketti og frettur frá ESB-löndum, Sviss og Noregi til Finnlands. Þær gilda aðeins um gæludýr sem eigendur ferðast sjálfir með og sem ekki eru ætluð til sölu eða til að afhenda nýjum eiganda.

1. Örmerking

Skylt er að örmerkja gæludýr í Finnlandi með einstaklingsörmerki á formi tölvuflögu. Húðmerking með húðflúri er aðeins tekin gild að uppfylltum vissum skilyrðum, sem lesa má um á vefsvæði finnsku matvælastofnunarinnar (Ruokavirasto). Dýr þarf að vera örmerkt til að geta fengið bólusetningu við hundaæði.

2. Bólusetning við hundaæði

Í Finnlandi er skylt að bólusetja dýr við hundaæði. Nánari upplýsingar um þær reglur sem gilda um bólusetninguna finnur þú á vefsvæði finnsku matvælastofnunarinnar (Ruokavirasto).

3. Ormalyf

Ekki er gerð krafa um að hundur sem fluttur er beint til Finnlands frá Noregi hafi fengið lyf við sullaveikibandormi. Hundar sem fluttir eru til Finnlands frá öðrum norrænum löndum þurfa þó að hafa fengið slík lyf. Ekki er nauðsynlegt að gefa köttum og frettum ormalyf. Nánari upplýsingar eru á vefsvæði finnsku matvælastofnunarinnar (Ruokavirasto).

4. Gæludýravegabréf

Gæludýri á ferðalagi þarf að fylgja gæludýravegabréf. Tvær útgáfur af gæludýravegabréfum eru til: Gæludýravegabréf Evrópusambandsins og gæludýravegabréf þriðja lands, fyrir gæludýr sem koma frá Noregi.

Nánari upplýsingar um gæludýravegabréf eru á vefsvæði finnsku matvælastofnunarinnar (Ruokavirasto).

Ferðalög með gæludýr frá Íslandi og öðrum löndum utan ESB til Finnlands

Um gæludýr sem ferðast með eiganda sínum frá Íslandi eða öðrum löndum utan ESB til Finnlands gilda sérstakar reglur sem finna má á vefsvæði finnsku matvælastofnunarinnar (Ruokavirasto).

Sé hundur, köttur eða fretta send til Finnlands án fylgdarmanns þarf dýralæknir sem viðurkenndur er af brottfararlandinu að skoða dýrið til að ganga úr skugga um að það sé heilbrigt og þoli að ferðast án fylgdarmanns. Að auki gilda sömu reglur um innflutninginn og útlistaðar eru hér að ofan undir fyrirsögninni Ferðalög með hunda, ketti eða frettur til Finnlands.

Ef samanlagður fjöldi hunda, katta og fretta er sex eða fleiri, eða ef ætlunin er að selja dýrin eða framselja í hendur nýrra eigenda að loknum innflutningi, þá þarf að fylgja þeim reglum sem gilda um innflutning í söluskyni.

Nánari upplýsingar eru á vefsvæði finnsku matvælastofnunarinnar (Ruokavirasto).

Í Finnlandi eru engar takmarkanir á innflutningi katta- eða hundategunda. Þó má ekki flytja til Finnlands dýr sem orðið hafa til við blöndun heimilishunds og dýrs af öðru hundakyni, eða við blöndun heimiliskattar og dýrs af öðru kattakyni. Nánari upplýsingar eru á vefsvæði finnsku matvælastofnunarinnar (Ruokavirasto).

Ekki má flytja til Finnlands dýr sem eru á alþjóðlegri skrá yfir framandi tegundir. Slík dýr er bannað að halda, rækta, flytja, selja eða sleppa út í náttúruna. Nánari upplýsingar eru í finnsku upplýsingagáttinni um framandi tegundir, Vieraslajit.fi.

Reglur um innflutning annarra gæludýra, svo sem kanína og annarra nagdýra, skrautfiska, skriðdýra, gælufugla og smásvína , finnur þú á vefsvæði finnsku matvælastofnunarinnar (Ruokavirasto). Þar má einnig finna leiðbeiningar varðandi innflutning hesta og annarra húsdýra .