Efnahagslegur viðbúnaður og áherslur á umbrotatímum

Sem formennskulönd í Norrænu ráðherranefndinni stóðu Finnland og Álandseyjar fyrir fundi norrænu efnahags- og fjármálaráðherranna þar sem efnahagslegur viðnámsþróttur og samkeppnishæfni Norðurlanda var efst á baugi.

„Efnahagsmál í heiminum einkennast af aukinni óvissu og Norðurlönd standa frammi fyrir öryggispólitískum veruleika sem krefst fjárfestinga í varnar- og öryggismálum. Það skiptir sköpum að við nálgumst þessar áskoranir af ábyrgum hætti ásamt því að um leið bæta skilyrði fyrir samkeppnishæfni Norðurlanda,“ sagði Riikka Purra, fjármálaráðherra Finnlands.

Norrænir fjármálamarkaðir eru á meðal þeirra samþættustu í heimi. Að tryggja vel starfandi og stöðuga fjármálamarkaði og greiðslulausnir, einkum á krísutímum, er grundvallaratriði fyrir heildarviðnámsþrótt hagkerfa og samfélaga á Norðurlöndum. Ráðherrarnir ræddu þær áskoranir sem breytt staða í öryggismálum, m.a. vegna blandaðra ógna, felur í sér fyrir stöðugleika fjármálamarkaða Þeir voru einhuga um að aðstæðurnar kalli á bæði innlendar og samnorrænar aðgerðir til að efla efnahagslegan viðbúnað á Norðurlöndum og ræddu slíkar aðgerðir.

„Öll norrænu löndin verða fyrir áhrifum vegna efnahagslegra og geópólitískra aðstæðna í kringum okkur. Forsendur okkar eru mismunandi en það er sameiginlegt verkefni okkar að tryggja öflug og samkeppnishæf hagkerfi og trausta fjármálamarkaði á Norðurlöndum, sérstaklega á krísutímum,“ sagði Mats Perämaa, fjármálaráðherra Álandseyja.

Vaxandi efnahagsleg óvissa, geópólitískar breytingar og ný staða í öryggismálum skapa ný skilyrði í ríkisfjármálum landanna, ekki síst með tilliti til verulega aukins kostnaðar við varnar- og öryggismál. Ráðherrarnir voru sammála um að efnahagsstefna gegni lykilhlutverki við að tryggja að efling varnarmála og öryggis á Norðurlöndum verði árangursrík og sjálfbær. Þeir lögðu jafnframt áherslu á mikilvægi aðgerða og umbóta á sviði ríkisfjármála til að auka langtímavöxt og alþjóðlega samkeppnishæfni norrænu landanna.