Norrænir jafnréttisráðherrar á vettvangi SÞ: „Norræn fjölskyldustefna skapar öruggari samfélög“

Undanfarin ár hefur orðið vart við bakslag í jafnrétti og réttindum kvenna og stúlkna. Norrænu ráðherrarnir vilja vinna gegn þessu með framtaki sínu „Pushing for Progress“. Á aðalviðburði sínum á CSW höfnuðu ráðherrarnir eindregið fullyrðingum um að jafnrétti og framsækin fjölskyldustefna, ásamt kyn- og frjósemisréttindum, grafi undan hefðbundnum fjölskyldugildum.

„Að stilla velferð fjölskyldna upp gegn jafnrétti er að skapa andstæðu sem er ekki til staðar. Norræn fjölskyldustefna er sönnun þess að aukið jafnrétti gagnast bæði fjölskyldum samfélaginu öllu,“ segir Sanni Grahn-Laasonen, félagsmálaráðherra Finnlands.

Lubna Jaffery, menningar- og jafnréttisráðherra Noregs, lagði áherslu á að jafnrétti væri ekki hugmyndafræði heldur hagnýt stefna sem bætir daglegt líf fólks. Hún benti á hvernig næstum eins árs launað fæðingarorlof og hágæða barnagæsla hefur aukið hlut kvenna á vinnumarkaði og bætt fjárhagslegt öryggi fjölskyldna.

„Jafnrétti er ekki mögulegt án fjárhagslegs öryggis. Að gefa bæði konum og körlum tækifæri til að vinna og eyða tíma með börnunum veitir þetta öryggi,“ segir hún.

Dómsmálaráðherra Íslands, Þorbjörg Sigríður Gunnlaugsdóttir, benti einnig á áhrif sjálfstæðs réttar til fæðingarorlofs, sem er fjárhagslega hagkvæm stefna sem einnig stuðlar að meiri velferð í samfélaginu.

„Jafnrétti snýst ekki bara um jafnrétti, það snýst líka um hagfræði. Það er auðvelt fyrir okkur á Norðurlöndum að líta á þetta sem sjálfsagðan hlut nú til dags, svo við verðum að minna okkur á hvers vegna við höfum unnið að þessum málum áratugum saman,“ sagði Þorbjörg Sigríður.

Að sögn Grahn-Laasonen beinist norræn fjölskyldustefna bæði að því að börnum og foreldrum líði vel og eru fjárhagslegur stuðningur við foreldra og hágæða dagvistun meðal þess sem hún nefnir sem dæmi um árangur á Norðurlöndum.

„Ég er sjálf dæmi um hvernig jafnréttismiðuð fjölskyldustefna gerir konu kleift að eiga bæði starfsferil og fjölskyldu. Ég á von á mínu þriðja barni og er ráðherra. Það er ekkert óeðlilegt við það á Norðurlöndum,“ segir Grahn-Laasonen.

Nina Larsson, jafnréttisráðherra Svíþjóðar, beindi sjónum að stafrænu umhverfi og hvernig reiknirit magna upp skaðleg viðmið og rangar upplýsingar. Hún undirstrikaði að Norðurlönd standa föst á því að verja fyrri árangur og halda áfram að knýja þróunina áfram.

„Við verðum að setja reglur um stafræna heiminn, með aldurstakmörkum og þess háttar, og svo þurfum við að vera meðvituð um öll þau öfl sem reyna að breyta narratífunni um jafnrétti og ýta henni í ranga átt,“ sagði Larsson.

Ráðherrarnir kynntu einnig áætlanir um Copenhagen Summit, þar sem Norðurlönd munu í haust stefna saman líkt þenkjandi þjóðum og öðrum aðilum til að standa gegn bakslaginu og efla jafnrétti á alþjóðavísu.