Samfélagsöryggi og stjórnsýsluhindranir í brennidepli þegar samstarfsráðherrar Norðurlanda komu saman í Helsinki
Þema fundarins var samfélagsöryggi en undir það falla jafnframt viðbúnaðarmál og viðnámsþróttur. Ráðherrarnir ræddu núverandi samstarf á sviði samfélagsöryggis innan Norrænu ráðherranefndarinnar út frá yfirlýsingu forsætisráðherranna frá því í maí.
Í norrænu samstarfi er áhersla lögð á viðbúnað á krísutímum og að tryggja lífsnauðsynlegar grunnstoðir samfélagsins. Á fundinum var mikilvægi aukins samstarfs ólíkra aðila til að tryggja almennt öryggi á svæðinu undirstrikað.
Atburðir síðustu ára hafa sýnt mikilvægi þess að norrænu löndin vinni saman að því að takast á við krísur sem teygja sig yfir landamæri. Sérstaklega var bent á þörfina á sameiginlegri undirbúningsvinnu nærliggjandi nágrannalanda enda er það talið lykilatriði í því að geta brugðist hratt og vel við þegar krísur koma upp í framtíðinni.
Ráðherrarnir funduðu einnig með Stjórnsýsluhindranaráðinu. Þema fundarins voru áherslur ráðherranna sjálfra í vinnunni að afnámi stjórnsýsluhindrana á næstu árum auk þeirra mála sem almennt eru á dagskrá Stjórnsýsluhindranaráðsins. Með hinni nýju áætlun um frjálsa för á Norðurlöndum 2025–2027 taka samstarfsráðherrarnir ásamt Stjórnsýsluhindranaráðinu virkan þátt í að vinna að stærri stjórnsýsluhindrunum með það fyrir augum að auka vægi þeirra innan landanna. Bæði áætlunin um frjálsa för á Norðurlöndum og starfsumboð Stjórnsýsluhindranaráðsins byggjast á samstarfsáætlun samstarfsráðherranna þar sem mikil áhersla er lögð á samþættingu og hreyfanleika á milli norrænu landanna. Jafnframt kemur þar fram að það eigi að vera einfaldara og eftirsóknarverðara fyrir fólk að búa, stunda nám eða vinnu og reka fyrirtæki í öðru norrænu landi.
Fyrsta forgangsmál samstarfsráðherranna var að fylgja eftir yfirlýsingu forsætisráðherranna um kennslasamræmingu frá 2024.
