Úttekt: 71 prósent af vörum sem keyptar eru í gegnum netið uppfyllir ekki efnavörulöggjöf

Úttektin sýndi að 71 prósent af þeim 210 vörum sem skoðaðar voru uppfylltu ekki efnavörulöggjöf ESB. Skoðaðir voru sjö vöruflokkar þar sem mikil hætta er fyrir hendi og reyndist ástandið verst þegar kom að rafrænum leikföngum en þar nam hlutfall vara sem brutu í bága við löggjöfina 81 prósenti.

Auk þess sem munur er á milli vöruflokka sýndi rannsóknin jafnframt að hættan á því að kaupa vörur sem innihalda hættuleg efni eykst eftir því hvers konar vefverslun er skipt við. Vörurnar sem voru skoðaðar voru keyptar á þremur vefsvæðum af mismunandi toga. Á markaðsvefsvæðum á borð við Amazon, Temu og Etsy nam hlutfallið 64 prósentum en hjá vefverslunum með eigin lager nam það 59 prósentum. Hjá dropshopping-verslunum, þ.e. vefverslunum sem ekki eru með eigin lager heldur láta senda vörur beint frá framleiðendum til viðskiptavinar, fór hlutfallið upp í 87 prósent.

Bent er á það í skýrslunni að nauðsynlegt sé að auka þekkingu þeirra sem selja vörur á netinu á efnavörulöggjöfinni og jafnframt er lögð áhersla á þörfina á öflugri eftirlitsstofnunum.

Dan Koivulaakso, yfirmaður hagvaxtar- og loftslagssviðs á skrifstofu Norrænu ráðherranefndarinnar, hlakkar til umræðna norrænu umhverfis- og loftslagsráðherranna um áskoranir í tengslum við netverslun á fyrsta fundi þeirra á árinu.

„Eitt af markmiðum norræns samstarfs á sviði loftslags- og umhverfismála er að bæði styðja við aukna innleiðingu hringrásarhagkerfis og stuðla að því að draga úr notkun hættulegra efna, jafnt á heimsvísu sem heima fyrir. Það að ná betri tökum á netverslun getur átt sinn þátt í því, auk þess sem það eykur öryggi norrænna neytenda,“ segir hann.

• Það var norrænn starfshópur um efnavörur (NKE) sem óskaði eftir úttektinni og sænska efnavörueftirlitið (KEMI) sem vann hana í samstarfi við öryggis- og efnavörueftirlit Finnlands, Danmerkur og Noregs. Verkefnið er fjármagnað af Norrænu ráðherranefndinni.
• Lögð er áhersla á vöruflokka þar sem mikil hætta er til staðar, svo sem ódýr raftæki og vörur úr mjúkplasti, og því dregur rannsóknin ekki upp mynd af öllum vöruflokkum sem seldir eru í gegnum netið.
• 155 af vörunum sem voru skoðaðar voru framleiddar í Kína. Í 67 tilvikum var ekki vitað um framleiðsluland og því kann að vera þar hafi einnig verið um Kína að ræða.
• Athugað var hvort vörurnar uppfylltu ýmis lög, svo sem RoHS-tilskipunina, REACH, POP-reglugerðina og tilskipun um öryggiskröfur fyrir leikföng.
• Skoðaðar voru vörur í eftirfarandi flokkum:

1. Skartgripir
2. Raftæki
3. Föt
4. Rafræn leikföng
5. Íþrótta- og útivistarvörur
6. Leikföng
7. Almennar vörur (t.d. sturtuhengi og gjafapappír)