Barátta Norðurlandaráðs fyrir jafnrétti heldur áfram
„Við vitum að heimsfaraldurinn hefur önnur áhrif á konur en karla. Skortur á jafnrétti innan heimilisins er beintengdur ónógu jafnrétti á vinnumarkaði. Konur hafa tekið á sig aukna umönnunarbyrði vegna heimsfaraldursins. Þannig verður ástandið til þess að festa gömul kynjahlutverk í sessi. Innan norska háskólasamfélagsins sést til dæmis að karlar hafa birt hlutfallslega fleiri greinar síðan heimsfaraldurinn skall á en hlutur kvenna fer minnkandi að sama skapi. Þetta sýnir hve skökk jafnréttisvogin er í samfélögum Norðurlanda og einnig það að Norræna ráðherranefndin og Norðurlandaráð bera sameiginlega ábyrgð á að vinna að því að þessi ójöfnuður skjóti ekki frekari rótum í heimsfaraldrinum og eftir að hann er yfirstaðinn,“ segir Nina Sandberg, talsmaður jafnréttismála í velferðarnefnd Norðurlandaráðs.
Aðdragandi þessarar yfirlýsingar er pólitískur samráðsfundur nefndarinnar um norræna jafnlaunavottun með danska atvinnumálaráðherranum, Peter Hummelgaard. Á fundinum beindi nefndin tilmælum til norrænu ríkisstjórnanna um að þróa sameiginlega norræna jafnlaunavottun í samstarfi við aðila vinnumarkaðarins, sem vinnustöðum á Norðurlöndum stæði til boða að nota. Ekki náðist samkomulag milli aðilanna tveggja á fundinum um tilmæli nefndarinnar um sameiginlega norræna jafnlaunavottun. Tengill á tilmælin er neðst í fréttinni.
Þannig verður ástandið til þess að festa gömul kynjahlutverk í sessi
Jafnrétti 2021
Velferðarnefndin ákvað nýverið að leggja áherslu á eftirfarandi málefni á sviði jafnréttis á næsta ári: Jafnrétti á vinnumarkaði og í félagslífi með áherslu á m.a. kyn, kynverund og jaðarsetta hópa. Einnig starfar nefndin áfram að því að miðla íslenska líkaninu að jafnlaunavottun á vinnumarkaði til annarra norrænna landa.
Velferðarnefndinni hefur skilist að einnig sé mikið um áreitni og hótanir á samfélagsmiðlum, sem ógnar hinu lýðræðislega norræna líkani með almennum hætti – og bitnar sérstaklega á konum og jaðarsettum hópum. Á árinu 2021 vill nefndin vinna saman að því að fyrirbyggja slíkt.