Bucht, fyrrum ráðherra, vill að Norðurlöndin standi sameinuð í næstu kreppu

Erfitt væri að finna nokkurn betur til þess fallinn að vinna að stjórnsýsluhindranamálum og frjálsri för yfir landamæri en Sven-Erik Bucht.

Hann á beinlínis heima á landamærum. Frá húsi sínu sem er á eyju í ánni Torne sér hann til lands í Svíþjóð í aðra áttina og til Finnlands í hina. Hér hafa tvíburabæirnir Haparanda og Torneå sem eru hvor sínum megin við landamærin þróast saman á mörgum sviðum.

Sven-Erik Bucht lifir með landamærasamstarfi dag hvern. Nú ætlar hann einnig opinberlega að vinna að málefnum sem snerta hreyfanleika og landamæri sem fulltrúi Svíþjóðar í Stjórnsýsluhindranaráðinu en verkefni þess að ryðja úr vegi hindrunum fyrir frjálsri för á Norðurlöndum.

„Þetta eru afar mikilvæg málefni og málefni sem ég hef mikinn áhuga á. Og þegar litið er til þess hvar ég á heima þá leyfi ég mér að segja að þetta séu málefni sem ég hef ákveðna þekkingu á,“ segir Sven-Erik Bucht.

Markmið Stjórnsýsluhindranaráðs er að ryðja úr vegi 8-12 tilteknum stjórnsýsluhindrunum ár hvert. Markmiðið er að það verði eins vandræðalaust og kostur er að flytja til annars norræns ríkis og ferðast yfir landamæri vegna vinnu eða náms eða að reka fyrirtæki handan landamæra.

„Við búum yfir framúrskarandi norrænu samstarfi en það eru enn fyrir hendi stjórnsýsluhindranir sem valda bæði fyrirtækjum og einstaklingum vanda. Það verður að vinna gegn þeim jafnt og þétt. Sýn okkar er sú að Norðurlöndin eigi að vera sjálfbærasta og samþættasta svæði heims árið 2030 og ef það á að ganga eftir verðum við að losna við stjórnsýsluhindranirnar,“ segir Sven-Erik Bucht.

Bucht hefur ekki enn myndað sér skoðun á því hvaða tilteknu hindranir hann hefur mestan áhuga á að vinna með, enda er stutt síðan hann tók sæti í Stjórnsýsluhindranaráðinu. Hann vill kynna sér fyrst hvað er brýnast.

„Við erum með ýmsar hversdaglegar stjórnsýsluhindranir sem einnig voru fyrir hendi áður en þessi kreppa skall á. Verkefnin eru næg.“

Kórónuveirufaraldurinn hefur verið mikið högg fyrir frjálsa för á Norðurlöndum. Strangar hömlur í löndunum hafa næstum stöðvað samskipti yfir landamærin, að minnsta kosti í bili.

„Nú í faraldrinum sjáum við gríðarlega afturför í samstarfi yfir landamæri, landamæri eru lokuð og nýjar hindranir verða til. Við verðum að takast á við þær strax,“ segir hann.

Helst vill Sven-Erik Bucht þó að Stjórnsýsluhindranaráðið vinni að forvörnum og stuðli að því að sami vandi komi ekki upp næst þegar kreppa skellur á.

„Næst verðum við að vera tilbúin með norræna áætlun til þess að takast á við kreppu svo við getum komið í veg fyrir þessi hörmulegu áhrif á frjálsa för yfir landamæri. Afleiðingarnar nú eru gríðarlegar meðal annars fyrir verslun og ferðaþjónustu.“

Sven-Erik Bucht vill líka að Norðurlöndin standi saman að því að tryggja aðgengi að hlífðarbúnaði og bóluefni á krepputímum. Hann leggur meðal annars til að norrænu ríkin komi sameiginlega á fót verksmiðju sem framleiðir bóluefni.

„Við höfum allar forsendur til að geta þetta, við höfum færni, þekkingu og fjármagn. Við verðum að virkja viljann. Ég er sannfærður um að almennur vilji sé fyrir þessu. Það þarf ekki sérfræðiþekkingu til að átta sig á því að lítil lönd standa ekki ein og sér fremst í röðinni til þess að kaupa hlífðarbúnað og bóluefni, þess vegna verðum við að vinna saman.“

Sven-Erik Bucht notar tilvitnun í látinn landsstjóra Norðurbotns, Ragnar Lassinantti, sem hvatningu í stjórnsýsluhindranastarfinu.

Í útvarpsviðtali árið 1965 sagði hann um það bil þetta: Það liggur í sálfræði landamæra að við hugsum oftast meðfram þeim en sjaldan yfir þau. Þetta eru nákvæmlega mistökin sem gerð eru núna í faraldrinum.

Stjórnsýsluhindranaráðið er pólitískt skipuð nefnd sem norræn stjórnvöld hafa falið að greiða fyrir fyrir frjálsri för einstaklinga og fyrirtækja innan Norðurlanda. Stjórnsýsluhindranaráðið heyrir undir Norrænu ráðherranefndina og hóf störf árið 2014.

Í myndbandinu hér að neðan má sjá hvernig Stjórnsýsluhindranaráðið starfar.